DIRETÓR INTERINU TIC TIMOR I.P SIMU AUDÉNSIA HUSI ADB TIMOR-LESTE NE’EBÉ FÓ ASISTÉNSIA BA MNEK

Diretór Ezekutivu Interinu Ajénsia Tecnologia da Informação e Comunicação (TIC) TIMOR I.P, Justo Fernandes ho nia ekipa, simu audénsia husi ekipa Asian Development Bank (ADB) iha Timor-Leste ne’ebé fó asisténsia ba Ministériu Negósiu Estranjeiru no Kooperasaun (MNEK) iha Diresaun Jerál Asuntu Association of Southeast Asian Nation (ASEAN) nian.

Objetivu husi audénsia ne’e, atu hatene kona-ba servisu ne’ebé TIC TIMOR halo ona no planu ne’ebé Ajénsia sei halo, tanba oras ne’e dadauk Diresaun refere hala’o hela diagnóstiku ba rekursu umanu iha ministériu no instituisaun sira ne’ebé aplika elementu esensiál husi adezaun Pilár ekonómiku ba ASEAN.

Liu husi diagnóstiku ne’e, identifika katak, TIC TIMOR I.P mós sai hanesan instituisaun ida ne’ebé presiza konsulta no konsidera hanesan plataforma teknolojia Governu Eletróniku ne’ebé iha nia papél atu implementa elementu importante iha adezaun ba ASEAN nian.

Iha enkontru ne’e Xefe Ezekutivu Interinu, aprezenta kona-ba ezisténsia Ajénsia ne’ebé hahú iha tinan 2017 bazeia ba dekretu lei númeru 29/2017.

Nia dehan, papél importante husi instituisaun ne’e, atu implementa Governu Eletróniku liu husi aplikasaun, infraestrutura, lei no polítika ICT nian rasik. Ajénsia ne’e nia programa to’o iha tinan 2030 no programa importante sira maka hahú husi infraestrutura báziku no aplikasaun prinsipál sira hafoin ajuda liña ministerial sira hodi dezenvolve sira nia aplikasaun.

Xefe interinu ne’e informa, dadus governu nian iha hotu rai liur tanba seidauk iha infraestrutura sufisiente no aplikasaun dezenvolve mós husi liur. Tanba ne’e TIC TIMOR I.P foti kauza husi Ministériu hotu-hotu, hodi kria governu eletróniku.

Timor-Leste agora dadauk, iha sistema barak no iha portal ne’ebé barak tanba ne’e, sei halo single portal ida, nune’e bele sai nu’udar fontes governu nian no sei akumula informasaun sira husi portal ministériu sira nian, hodi sai hanesan portal úniku no informasaun hotu akumula iha portal ne’e.Ajénsia mós hosting ona Website ba CNC, AIFAESA, sistema Dalan Ba Futuru nomós TIC TIMOR rasik.

Iha mós ministériu lubuk ida ne’ebé koneta ona mai Ajénsia maka hanesan, MNEK, MS, PCM, GPM, MRLAP, SECOMS, SEPFOPE, MOP, PNDS, Ministériu Estatál nomós ministériu lubuk ida ne’ebé hakarak hetan ligasaun husi TIC TIMOR no Ajénsia mós halo ona aprezentasaun.

Ajensia mos, halo ona ligasaun (FOT) ne’ebé kobre iha munisípiu 12 ho nia objetivu atu kria rede governu nian rasik nune’e labele depende ba operadór seluk ne’ebé eziste iha ne’e no redús kustu ba asesu konteúdu lokál sira hanesan Dalan ba Futuru, freebalance. Projetu refere atinje ona 98%.

Ho nune’e, Fernanda Borges ne’ebé lidera diagnóstiku ne’e hatete, teknolojia nu’udar plataforma ne’ebé importante tebes atu implementa iha ministériu sira liu-liu Ministériu Agrikultura no Peska (MAP), Ministériu Komérsiu no Indústria, nomós Ajénsia Autónoma sira hanesan APORTIL, Alfándega, Quarantine hodi monta sistema sira tanba TL potensialmente ho membru ASEAN sira tanba ASEAN hanesan akordu atu fasilita komérsiu.

Nia sujere atu TIC TIMOR iha koordenasaun ho Alfándega hodi hatudu infraestrutura nune’e bele liga website sira no tenke foka liu setór ekonomia sira nune’e bele hatudu progresu.

Entretantu nia dehan, sira nia parte enkoraja nafatin TIC TIMOR hodi kontinua hala’o servisu ho esforsu tomak ne’ebé iha. #Média TIC#