AJÉNSIA TIC TIMOR I.P. ASINA MoU HO CMTL, S.A

Ajénsia Teknolojia Informasaun no Komunikasaun sigla portugués, (TIC TIMOR I.P.), Asina memorandum of understanding (MoU) ho Kompañia Mineira Timor-Leste, S.A. (CMTL), kooperasaun servisu ne’e atu alkansa Programa Oitavu Governu (VIII Governu) nia programa bá iha Governu Eletróniku ka E-Government.

Iha serimónia asina nota entendimentu ne’e, Diretór Ezekutivu TIC TIMOR I.P. Sr. Roberto Caitano de Sousa Vicente hatete, TIC TIMOR hari atu dezenvolve liu tan mundu informasaun teknolojia iha rai laran hodi nune’e bele asegura dadus instituisaun estadu nian iha sentru dadus Governu nian.

” Liuhosi servisu hamutuk ida ne’e, CMTL, S.A. mós sei kontribui ba esforsu TIC TIMOR I.P. nian servisu hodi hamenus gastu lanesesariu sira iha area Informátika, sentraliza no asegura dokumentu no informasaun iha Sentru-dadus Governu Eletróniku, fasilita asesu ba padraun Teknolojia no aplikasaun ne’ebe modernu, seguru, atualizadu, dezenvolvidu no aseguru husi Timor-Oan rasik. Ho asinatura Nota Entendimentu ida ne’e no kontinua ho akordu nivel servisu sira seluk”, dehan Diretór Ezekutivu.

Iha biban ne’e lider másimu TIC TIMOR ne’e mós esplika kona-ba ezisténsia TIC TIMOR I.P., TIC TIMOR hanesan Instituisaun Públika hari’i iha VI Governu Konstitusionál liuhosi Dekretu-Lei no.29/2017 iha 02 Agostu 2017 no Tutela ba Na’i Primeiru-Ministru. Ajénsia ida ne’e hari’i iha momentu ida ne’ebé ho baze atu dezenvolve diak liu tan setór Informasaun, Comunikasaun no Teknolojia (ICT) hodi hafasil servisu ho kualidade diak ba instituisaun governu sira hotu no ajénsia no empreza estadu sira hotu, eleva sira nia koñesimentu nune’e sei promove dezenvolvimentu sósiu ekonómiku, diversifikasaun ekonomia, bem-estar no mós kualidade moris sidadaun sira nian, ne’ebé tranzmite liuhosi aspetu Kompañia Mineira Timor-Leste, S.A (CMTL)  hanesan fontes ida ne’ebé importante tebes ne’ebé hatudu iha mandatu atu hala’o no involve iha atividade minerai sira inklui atividade sira ne’ebé liga ho prospesaun, peskiza, avaliasaun, dezenvolvimentu, esplorasaun, tratamentu no komersializasaun minarais iha territóriu Timor-Leste no mós iha rai-liur, iha futuru.

Ajénsia TIC TIMOR entende tebes servisu CMTL nian tanba ne’e importante tebes ba papél CMTL nian, tanba TIC bele dezenvolve tuir nesesidade CMTL nian iha kurtu, médiu no longu prazu hodi fasilita diak liu tan prestasaun servisu kona-ba setór minarai liga ba properasaun, avaliasaun, dezenvolvimentu, esplorasaun, tratamentu no komersializasaun minarais iha teritoriu Timor-Leste no mós iha rai liur ne’ebé liña komunikasaun importante tebes hodi hafasil servisu CMTL nian iha rai laran no mós ba iha rai liur.

Iha fatin hanesan, Prezidente CMTL, S.A. Sr. Eliud de Jesus Gomes hato’o agradesimentu ba Ajénsia TIC no rekoñese kualidade servisu TIC nian iha área teknolojia nian.

“Ami orgullu tebes bainhira temi TIC no ami hanoin merese duni Instituisaun estadu ida servisu hamutuk ho ami, orgullu tanba bele suporta malu iha aspetu informasaun no komunikasaun nian. Ami onestu rekoñese kualidade servisu TIC TIMOR nian, ami la iha koñesimentu iha área informasaun no teknolojia, primeira ves koñese TIC TIMOR ami fó tomak esperansa ba TIC atu lori ami ba aspetu teknolojia”, apresia Diretór ne’e ba TIC TIMOR I.P.

Asina Nota entendimentu ba kooperasaun servisu iha área informátika ne’e iha komponente lima mak hanesan : 1) Ospedajen “Domain Naming Services” no korrespondente (CMTL.TL) ho ninia rekizitu nesesáriu hodi estabelese enderesu sistema portal website. 2) Ospedajen “Domain Naming Services” no korespondente (CMTL.TL) ho ninia rekizitu nesesáriu hodi estabelese enderesu aplikasaun refere. 3) Ospedajen “Domain Naming Services” no korrespondente (CMTL.TL) ho ninia rekizitu nesesáriu  hodi estabelese “Email Service”.  4) Apoiu Dezenvolvimentu Infraestrutura Teknolojia Informasaun no Komunikasaun nian: rejistu domíniu, korreiu eletróniku, rede lokál, Konetividade no Ko-lokasaun. 5) Sistema aplikasaun no servisu konetividade nesesáriu sira-seluk. #Média #TIC.