AJÉNSIA TIC TIMOR I.P ASINA NOTA ENTENDEMENTU HO INSTITUTU BAMBU TIMOR-LESTE

Ajénsia Teknolojia Informasaun no Komunikasaun sigla português (TIC) TIMOR I.P., asina Nota Entendimentu, sigla ingles (MoU) ho Institutu Bambu Timor-Leste I.P., ba komponente tolu iha área Teknolojia nian.

Komponente tolu ne’e maka hanesan, rejistu sistema Email Ofisiál, kriasaun ba domino website ofisiál Sentru Bambu nian nomós servisu nesesáriu sira seluk ne’ebé presiza atu dezenvolve.

Iha serimónia asinatura ne’e, Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente iha ninia diskursu hatete, TIC TIMOR harii atu tulun instituisaun estadu sira liu-liu iha área informátika tanba papél TIC TIMOR atu ajuda instituisaun hirak ne’e hodi dezenvolve sistema no aplikasaun ne’ebé maka sira presiza.

Tanba objetivu loloos harii Ajénsia ida ne’e, maka atu sentraliza rekursu sistema informátika estadu nian iha fatin ida hanesan kriasaun website, baze dadus, treinamentu nomós área espesífiku ba ICT.

Kooperasaun ne’e, hanesan faze dahuluk hosi kooperasaun barak ne’ebé maka sei eksplora iha tempu oin mai.

“Ho apoiu ne’ebé hahú fornese hosi TIC TIMOR bele tulun Institutu Bambu hodi habelar liu ejisténsia nomós servisu ne’ebé maka iha no hakarak. Ho maneira ida ne’e atu bele transforma instituisaun estadu ne’ebé maka dijitál liu, menus sistema manuál atu bele hakbesik aan ba povu tanba dala barak iha produtu barak maibé laiha espasu atu habelar saida maka iha ho kualidade tanba ne’e, liu hosi plataforma eletróniku hanesan website bele habelar informasaun sira ba mundu,” esplika Diretór Ezekutivu.

Xefe Ezekutivu hatete, TIC TIMOR tutela diretamente ba Primeiru-Ministru tanba ne’e, kualkér polítika ne’ebé maka halo, hetan orientasaun diretamente hosi Primeiru-Ministru atu hatudu vontade polítika boot hodi dudu prosesu dizitalijasaun ba oin.

“Institutu Bambu hola parte mós hanesan kliente ba 92 katak instituisaun Governu barak maka agora koopera ona ho TIC TIMOR iha área oioin. Liu hosi kooperasaun servisu ne’e halo ona poupansa barak kuaze millaun $75 hahú hosi tinan 2017 to’o 2022,” Informa Xefe Ezekutivu.

Diretór salienta tan kata, ida ne’e, bele halo poupansa di’ak liu tan bainhira instituisaun estadu sira iha vontade atu uza servisu ne’ebé maka TIC TIMOR fornese.

Iha fatin hanesan, Diretór Ezekutivu Sr. António dos Santos de Matos hatete, Timor-Leste hanesan nasaun ida labele tarde iha teknolojia tanba ne’e, ho kooperasaun servisu ida ne’e bele fasilita sira nia servisu hodi promove produtu Bambu ba mundu.

“Agradese ba TIC TIMOR tanba bele apoiu ona Sentru Bambu liu hosi área teknolojia tanba produsaun Bambu tinan ba tinan aumenta maibé bainhira laiha odamatan ida ne’ebé nakloke atu ema iha mundu hatene katak Timor-Leste mós iha nia produtu ida ne’ebé maka di’ak,” dehan Diretór Ezekutivu Institutu Bambu.

Diretór Ezekutivu hein katak, ho servisu hamutuk ida ne’e, hein katak TIC TIMOR bele fó nafatin  apoiu hodi servisu hamutuk atu nune’e, iha futuru bele la’o ba oin nomós bele da’et ba instituisaun seluk atu bele hatene loloos TIC TIMOR harii atu lori Timor-Leste ba mundu liu hosi área teknolojia.

Memorandu Entendimentu ne’e, asina hosi Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente no Diretór Ezekutivu Sr. António dos Santos de Matos.

Iha biban ne’e, asina mós kooperasaun servisu nível tékniku ba website no sistema aplikasaun ne’ebé asina hosi Diretór Dezenvolvimentu Sistema Aplikasaun (DSA) TIC TIMOR Sr. Justo Fernandes no kriasaun E-mail Ofisiál ne’ebé asina hosi Diretór Diresaun Infraestrutura TIC TIMOR Sr. André Felix Marques.

Alende ne’e, System Design TIC TIMOR Sr. Felisberto Emilio Gonsalves, halo mós introdusaun kona-ba website ne’ebé maka dezenvolve ona.

Entretantu iha serimónia ne’e, lansa mós website Institutu Bambu Timor-Leste I.P. nian ne’ebé dezenvolve hosi Ajénsia TIC TIMOR I.P. #MÉDIA#TIC