AJÉNSIA TIC TIMOR I.P., ATRIBUI SERTIFIKADU APRESIASAUN BA FUNSIONÁRIU NA’IN 4 HOSI GGQS

Ajénsia Teknolojia Informasaun no Komunikasaun, sigla português (TIC) TIMOR I.P., liu hosi Divizaun Dezenvolvimentu Sistema Aplikasaun (DSA), atribui sertifikadu apresiasaun ba funsionáriu na’in 4 hosi Ministériu Saúde, liu hosi Gabinete Garantia Qualidade Saúde (GGQS) ne’ebé tuir ona treinamentu kona-ba jestaun administrasaun website ne’ebé fornese hosi tékniku TIC TIMOR I.P..

Iha serimónia enserramentu ba treinamentu refere, Vise-Diretór Ezekutivu TIC TIMOR I.P., Justo Fernandes hanesan mós Diretór Divizaun Dezenvolvimentu Sistema Aplikasaun hatete, treinamentu ne’e, parte ida hosi suporta ne’ebé TIC TIMOR fó ba Gabinete Garantia Kualidade Saúde, ne’ebé kompleta ona formasaun ida ne’e, oinsá atu atualiza informasaun iha website.

Nia esplika, Treinamentu ida ne’e, la’ós rohan hosi servisu sira ne’ebé TIC TIMOR fornese ba GGQS maibé, sei iha manutensaun. Alende manutensaun, sei iha apoiu téknika.

Governu halo ona investimentu iha área teknolojia nian iha TIC TIMIOR tanba ne’e, hein katak formasaun ida ne’e, bele ajuda ekipa hosi GGQS hodi bele atualiza informasaun ba iha website.

“Fiar katak, hafoin treinamentu ida ne’e, bele atualiza informasaun iha website atu nune’e públiku bele asesu ba informasaun GGQS nian,” nia informa.  

Iha fatin hanesan, Diretór Jerál Interinu GGQS, Helder Mendonça de Carvalho, apresia ba TIC TIMOR nia servisu durante ne’e, iha área ne’ebé maka rekerente.

“Maske tuir ona formasaun maibé husu nafatin TIC TIMOR nia apoiu iha parte balun bainhira iha difikuldade iha parte tékniku,” dehan nia.

Entretantu, sira nia parte agradese ba TIC TIMOR nia disponibilidade no prontidaun hodi fasilita GGQS ho formasaun ne’ebé di’ak tebes ho website ne’ebé iha no parte GGQS tenke adapta era globalizasaun ida ne’e.  #MÉDIA TIC#