AJÉNSIA TIC TIMOR I.P ATRIBUI SERTIFIKADU APRESIASAUN BA FUNSIONARIU NA’IN LIMA HUSI MTKI

Ajénsia Tecnologia da Informação e Comunicação (TIC) TIMOR I.P, atribui sertifikadu apresiasaun ba funsionariu na’in lima husi Ministériu Turizmu Komérsiu no Indústria (MTKI) hafoin remata treinamentu kona-ba sistema kobotoolbox durante loron haat. Iha serimónia fahe sertifikadu ne’e, Vise-Diretór Ezekutivu TIC TIMOR I.P hanesan mós Diretór Divizaun Sistema Aplikasaun, Justo Fernandes hatete, ida ne’e buat ne’ebé foun tanba ne’e labele obriga buat ne’ebé foun atu hatene lalais maibé tenke la’o tuir nia etapa nune’e bele kompriende tanba kualidade treinamentu maka importante. Treinamentu ne’e, hanesan fundamentu ba partisipante sira atu hala’o nia kna’ar iha Diresaun Nasionál Estatístika MTKI atu halibur dadus sira hotu. Ida ne’e servisu ida ne’ebé boot no Timor-Leste iha dadus sira ne’e atu halibur iha sistema no tempu to’o ona atu uza sistema atu bele hafasil servisu. Iha fatin hanesan, Diretór Nasionál Peskiza no Estatístika MTKI, Immanuel de Araújo Mendonça, hein katak, liu husi formasaun ida ne’e, ba oin sei realiza servisu sira ne’ebé relasiona ho monitorizasaun servisu sira iha merkadu. Ida ne’e maka tarjetu ba dahuluk ninian tanba durante ne’e, MTKI halo duni monitorizasaun ho meius ida ne’ebé maka tradisionál ituan maibé ho prezensa TIC TIMOR nian lori ona buat ne’ebé maka modernu. Alende ne’e, Henrique Araújo Pereira hanesan partisipante hatete, formasaun ne’ebé tuir, hanesan parte ida husi akordu ne’ebé maka halo iha tiha ona no loron haat ne’e, sira aprende kona-ba oinsá atu utiliza sistema kobotoolbox tanba sistema ida ne’e fasilita Diresaun Nasionál Peskiza Estatístika MTKI nian hodi halo koleta ba dadus ne’ebé maka iha munisípiu 13. “Durante tuir formasaun ida ne’e kuaze aprende to’o 70% faze dahuluk nian ami tuir maka atu kria formuláriu no oinsá maka atu evita informasaun ida ne’ebe ho di’ak iha baze,” dehan nia. #MÉDIA TIC#