AJÉNSIA TIC TIMOR I.P. ATRIBUI SERTIFIKADU TREINAMENTU PORTAL BOA NOTISIA BA FUNSIONARIU SECOMS

Ajénsia Tecnologia da Informação e Comunicação, sigla portugés (TIC) TIMOR I.P., liu husi Divizaun Dezenvolvimentu Sistema Aplikasaun (DSA) Atribui Sertifikadu treinamentu Portal GoodNews (BoaNotisia) ba Funsionáriu Sekretaria Estadu Komunikasaun Sosiál (SECOMS).

Fahe Sertifikadu ida ne’e hanesan parte apresiasaun husi Ajénsia TIC TIMOR I.P. ba funsionáriu SECOMS ninian ne’ebé durante loron tolu tuir ona treinamentu.

Iha serimónia ne’e Vise Diretór Ezekutivu TIC TIMOR I.P. Sr. Justo Fernandes hatete, formasaun ida ne’e papél importante TIC TIMOR nian ba Instituisaun Estadu sira.

“Formasaun ida ne’e hanesan pakote ne’ebé TIC TIMOR fornese liu husi sistema dezenvolvimentu ninia ne’ebé normalmente TIC TIMOR fornese ba iha instituisaun estadu sira hotu, ita hahú husi access men, analiza dezenvolvimentu Sistema, treinamentu, manutensaun sistema nomos apoiu téknika” informa Diretór .     

Vise Ezekutivu ne’e realsa tan katak, Bainhira remata treinamentu ida ne’e husi parte TIC nian mak sei responsabiliza kona-ba  manutensaun no bainhira parte SECOMS nian halo publikasaun ba iha Portal parte TIC sei prontu nafatin hodi fó apoiu téknika tanba TIC iha ona staff hirak ne’ebé dedikadu web administrator nian ne’ebé prontu apoiu téknika bainhira iha difikuldade.    

Iha serimónia atribuisaun sertifikadu ida ne’e, Vise Diretór Ezekutivu nomos Diretór Dezenvolvimentu Sistema Aplikasaun (DSA) ne’e informa katak, dadus/ konteúdu ne’ebé hosting iha sentru dadus TIC TIMOR nian hodi asegura memória institusionál tanba ida ne’e investimentu Governu nian.    

“Konteúdu hirak ne’ebé hosting iha sentru dadus TIC TIMOR nian ida ne’e laos TIC nian maibé ida ne’e sentru dadus Governu nian tanba ida ne’e investimentu Governu nian ho polítika ida katak, ita estabelese sentru dadus ida ne’e hodi konteúdu husi Portal instituisaun estadu ninian konsentra hotu iha sentru dadus TIC TIMOR atu asegura memória institusionál nian tanba ita hotu hatene katak bainhira Governu ida mai no id aba informasaun sira ne’e mós ba hotu, depois Governu foun mai informasaun la iha no hahú husi zero. Bazeia ba ida ne’e hotu TIC TIMOR iha hodi responde nesesidade sira ne’e hotu” deklara Diretór ne’e.

Entretantu, Diretór DSA ne’e mós lori Ajénsia nia naran fó agradese ba SECOMS ne’ebé fó konfiansa ba TIC TIMOR hodi dezenvolve sistema hirak ne’e. Papél importante husi TIC TIMOR nian ne’ebé agora daudaun hala’o hela laos de’it iha parte aplikasaun nian maibé iha mós parte infraestrutura tékniku hirak ne’ebé apoiu mesak Timoroan, ida ne’e hatudu katak ita Timoroan mós bele halo. Sertifikadu ida ne’e hanesan sertifikadu apresiasaun ne’ebé TIC TIMOR fó ba formadu sira hodi nune’e bainhira sira haree sertifikadu hirak ne’e sira bele lembra fila-fali atendimentu formasaun sira ne’e, esklarese Diretór.

Iha biban ida ne’e, Xefe Gabinete Sekretaria Estadu Komunikasaun Sosiál (SECOMS) Sr. Osorio Almeida lori Ministru ba Asuntu Parlamentares no Komunikasaun Sosiál (MAPCOMS) no Sekretáriu Estadu Komunikasaun Sosiál (SECOMS) nia naran hato’o agradesimentu ba Diretór Ezekutivu no kargu Xefia sira nomos ba funsionáriu sira hotu ba apoiu tomak ne’ebé fó ona mai SECOMS.

“Lori Ministru MAPCOMS no sekretáriu Estadu Komunikasaun Sosiál (SECOMS) nia naran fó agradesimentu ida ne’ebé mak kle’an liu ba Diretór Ezekutivu, Kargu xefia no funsionáriu tomak no laos de’it kona-ba treinamentu ne’e maibé deske inísiu ita iha ona kolaborasaun ne’ebé diak hodi ajuda ami, laos de’it kona-ba Boa Notísia maibé oinsá mak atu arkiva dadus iha nia fatin hodi nune’e Governu foun mai bele hetan fali dadus arkiva hirak ne’e”, deklara Xefe ne’e.

Xefe Gabinete ne’e aumenta tan katak, tuir treinamentu ida ne’e hodi funsionáriu SECOMS sira bele iha koñesimentu oinsá atu jere Portal refere ho kualidade diak.   

“Ho formasaun ida ne’e ami nia IT sira bele iha koñesimentu abilidade téknika ho pratika oinsá bele jere funsionamentu Portal Boa Notísia ho diak, oinsá bele halo peskiza, analiza ba notísia ne’ebé diak tuir natureza Boa Notísia, tanba ne’e bainhira ita hakarak asegura funsionamentu Portal ne’e ninia orijinalidade depende ba ami nia formadu sira ne’ebé durante ne’e tuir treinamentu oinsá mak jere Portal ne’e”.

Bainhira atu remata serimónia Xefe Gabinete ne’e mós husu atu  kooperasaun entre TIC no SECOMS laos dei’t para iha ne’e maibé ba oin nafatin presiza tulun husi Diretór no komponente tomak iha TIC TIMOR hodi nune bele nafatin fasilita no apoiu tanba hotu-hotu ninia objetivu  oinsá mak ninia funsionamentu ne’e lao ho diak tuir hotu-hotu ninia hakarak no mehi.

Entretantu, Serimonia atribui sertifikadu ne’e hala’o iha edifisiu Sekretaria Estadu Komunikasaun Sosiál #MEDIA #TIC.