AJÉNSIA TIC TIMOR I.P., FÓ-FORMASAUN JESTAUN ADMINISTRASAUN WEBSITE NO SISTEMA INFORMASAUN JEOGRÁFIKA BA FUNSIONÁRIU INSTITUTU BAMBU I.P.

 

Ajénsia Teknolojia Informasaun no Komunikasaun sigla português (TIC) TIMOR I.P., liu hosi Diresaun Dezenvolvimentu Sistema Aplikasaun (DSA) fó-formasaun jestaun administrasaun website no sistema informasaun jeográfika ba funsionáriu hosi Institutu Bambu.

Formasaun ninia objetivu mak atu fasilita funsionáriu ne’ebé sei responsabiliza ba website refere hodi halo publikasaun kona-ba informasaun no atividade Institutu Bambu nian ho Profesionál, Seguru no efisiente inklui mapamentu jeográfika atu ajuda ekipa hosi Bambu I.P. hodi hatene lokalizasaun Bambu nomós medida plantasaun Bambu.

Iha abertura ba formasaun ne’e, Diretór Ezekutivu Institutu Bambu Sr. Anito Matos hatete, agradese ba ekipa TIC TIMOR ne’ebé mai hamutuk ho ekipa hosi Institutu Bambu tanba Institutu Bambu presiza teknolojia ne’ebé maka avansadu área marketing ninian atu nune’e produtu ne’ebé sai hosi Institutu Bambu ema hatene no labele haklaken de’it ba nível nasionál maibé ba internasionál.

Ohin loron iha mundu globalizasaun presiza uza teknolojia ne’ebé maka avansadu no Governu harii TIC TIMOR ho servisu hamutuk ida ne’e ba oin bele iha pasu pozitivu ne’ebé barak no hamutuk haklaken no promove produtu ne’ebé Timor-Leste iha.

Hein katak, buat ne’ebé Institutu Bambu presiza TIC TIMOR bele apoiu hodi habelar informasaun ba mundu internasionál.

Iha fatin hanesan, Diretora Interina Diresaun Dezenvolvimentu Sistema Aplikasaun (DSA) Sra. Maria da Frosa H. Marques, agradese ba Institutu Bambu ba fiar ne’ebé fó ba TIC TIMOR hodi dezenvolve ona website no sistema Informasaun Jeográfika ba Institutu Bambu.  

TIC TIMOR nia kna’ar atu asegura rede Governu nian, integra dadus Governu nian nomós asegura informasaun Governu nian.

Ekipa tékniku hosi TIC TIMOR dezeñu direta website sira, dezeñu sistema sira, ho nune’e fiar katak dadus Governu nian sei la lakon. TIC TIMOR agradese tanba Bambu I.P., parte hosi instituisaun estadu 47 ne’ebé ekipa DSA fornese servisu ICT nian.

Alende ne’e, ekipa refere dezeñu ona web portal no web application hamutuk 85. Halo mós hosting ba web portal no web application hosi ekipa Timor oan hamutuk 103 no TIC TIMOR mós fornese servisu melloramentu migrasaun sistema hamutuk 22. Sistema ne’ebé iha, kontribui ona ba poupansa Orsamentu Estadu.

Fiar katak ho kolaborasaun no konfiansa hosi Bambu I.P. ba TIC TIMOR hodi bele kria no fornese sistema ida ne’ebé fasil no seguru atu asesu nomós hamenus birokrasia. TIC TIMOR liu hosi Diresaun DSA fornese servisu eletróniku liu hosi dezeñu website, dezeñu web portal nomós web application.

Tanba ne’e, TIC TIMOR liu hosi ekipa DSA ne’ebé sei fornese treinamentu espesífiku liu ba web portal ne’ebé kompletu ho mapamentu jeográfika ba GRUPU Bambu ne’ebé kuda Banbu iha Timor-Leste liu hosi finansiamentu Institutu Bambu. Sistema web portal no mapamentu ne’e sei ajuda ekipa hosi Bambu I.P. hodi hatene lokalizasaun Bambu nomós ninia lokalizasaun.

Entretantu formasaun ne’e, lidera hosi Formadór TIC TIMOR I.P., Sr Tiago Fernandes ho ekipa tékniku durante loron tolu iha edifísiu Institutu Bambu, Tibar.  #MÉDIA#TIC