AJÉNSIA TIC TIMOR I.P. HAHÚ SELEBRASAUN ANIVERSÁRIU BA DAHAAT HO MISA AGRADESIMENTU

Ajénsia Tecnologia da informação e Comunicação (TIC) TIMOR I.P. hahú selebrasaun aniversáriu ba dahaat hodi hasa’e misa agradesimentu. Misa ne’e rasik dirije husi Padre Celestino da Costa SDB, iha Kapela Dom Bosco Comoro. 

Iha omilia, Padre selebrante hatete, iha tinan haat nia laran, iha ona progresu servisu lubuk ida ne’ebé Governu sente no haree. Liuhosi selebrasaun ida-ne’e, nu’udar dalan ida hodi agradese ba Na’i Maromak nia grasa matenek nian, ne’ebé hatún mai iha funsionáriu TIC sira hodi hamosu progresu servisu Teknolojia Informasaun no Komunikasaun. Susesu ne’ebé hetan hosi rezultadu servisu ne’e nu’udar planu Maromak nian.

Iha fatin seluk, Diretór Ezekutivu TIC TIMOR I.P., Roberto Caitano de Sousa Vicente afirma, durante ninia lideransa, aprende barak hosi funsionáriu sira no orgullu  tebes tanba Ajénsia ida-ne’e kompostu hosi joven ne’ebé ho badain iha idak-idak nia servisu fatin.

Xefe Ezekutivu ne’e realsa tan katak kada funsionáriu rai sira ida-ida nia lembransa ba Ajénsia ida-ne’e no kontribui ba Governu liu hosi servisu ne’ebé Estadu fó fiar hela ba TIC TIMOR.

Aleinde ne’e, Pesoál Helpdesk, Marta Cardoso ne’ebé reprezenta funsionáriu TIC TIMOR I.P., afirma liu hosi workshop ida-ne’e, bele halo funsionáriu sira koñese malu di’ak liután.

Nia dehan, maske hasoru dezafiu oioin maibé, bele atinje progresu servisu no bele aumenta tarefa servisu.

Nia parte mós lori funsionáriu tomak nia naran, hato’o agradese barak ba TIC TIMOR tanba bele aumenta sira nia kapasidade la’ós de’it iha área tékniku maibé iha mós área atendementu kliente iha munisípiu atu haklaken no habelar vizaun no misaun Ajénsia TIC TIMOR nian iha munisípiu.

Iha serimónia ne’e, lansa mós relatóriu anuál tinan-2020 nian, ne’ebé Diretór Ezekutivu maka lansa hamutuk ho Diretór Divizaun sira.

Entretantu iha biban ne’e mós, entrega simbólikamente xave motorizada ba helpdesk munisípiu 12 hodi fasilita sira nia servisu loroloron.  #MÉDIA TIC#