AJÉNSIA TIC TIMOR I.P HALO ROTASAUN BA FUNSIONÁRIU HELPDESK IHA MUNISÍPIU 5

Ajénsia Tecnologia da Informação e Comunção (TIC) TIMOR I.P, liu husi Rekursu Umanu halo rotasaun ba funsionáriu helpdesk iha munisípiu lima tanba rotasaun ne’e, hanesan polítika Ajénsia TIC TIMOR nian ho objetivu atu haboot liután pesoál sira nia sentidu nasionalizmu hodi kontribui atu hadi’a liu tan servisu instituisaun estadu nian nomós pesoál sira bele aprende oinsá lala’ok servisu inklui kondisaun iha munisípiu seluk.
 
Iha biban ne’e, Ofisial Rekursu Umanu TIC TIMOR I.P, Juvenal Soares do Carmo Lay, introdús pesoál helpdesk na’in lima  ba autoridade Munisípiu sira hodi esplika kona-ba servisu ne’ebé pesoál helpdesk foun sei halo, hanesan servisu kontinuasaun husi servisu sira ne’ebé pesoál helpdesk antes halo ona no  sira ne’e mós iha koñesimentu tékniku ne’ebé hanesan tanba ne’e, bele garante katak servisu sei la’o ho di’ak nafatin.
 
 
Ofisial Rekursu Umanu ne’e mós haktuir katak , Presidente Autoridade, Administradór no Adjuntu/a sira nia observasaun ba, pesoál Helpdesk sira hotu ne’ebé destaka iha Munisípiu ida-idak durante tinan ida nia laran hatudu duni lala’ok servisu ne’ebé di’ak, disiplina no profesionalidade.
 
Nia mós relata katak, Prezensa pesoál helpdesk sira konsege rezolve duni problema sira ne’ebé Administrasaun Munisípiu sira enfrenta hanesan, Sistema ne’ebé la’o neineik, konetividade ne’ebé ladún di’ak, komputadór sira ne’ebé at, no seluk-seluk tan.
 
Nia afirma katak, Autoridade Munisípiu rekomenda ba TIC TIMOR I.P atu hadi’a liután servisu sira ne’ebé TIC TIMOR fornese no hasa’e liután kapasidade pesoál Helpdesk sira nian.
 
Entretantu Pesoál helpdesk sira ne’ebé hetan rotasaun maka husi Munisípiu Viqueque, Lautém, Baucau, Ermera no Ainaro. #MÉDIA TIC#