AJÉNSIA TIC TIMOR I.P NO IPB ASINA NOTA ENTENDEMENTU BA KOOPERASAUN SERVISU IHA ÁREA TEKNOLOJIA

Diretór Ezekutivu Ajénsia Tecnologia da Informação e Comunicação, (TIC) TIMOR I.P, Roberto Caitano de Sousa Vicente no Prezidente Institutu Politékniku Betano (IPB) Kay Rala Xanana Gusmão, Acácio Cardoso Amaral asina nota entendementu hodi servisu hamutuk iha área teknolojia nian liu-liu ba iha parte dezenvolvimentu portal website, ho hosting no servisu email sira hodi fasilita IPB iha sistema informasaun.

Iha serimónia asina nota entendimentu ne’e, Xefe Ezekutivu hatete, Ajénsia TIC TIMOR nia papél atu implementa polítika tomak iha área informátika ho nia implementasaun ligadu ba inisiativa Governu Eletróniku ne’ebé harii ho dekretu lei númeru 29/2017.

“Ida ne’e polítikamente fó pezu ne’ebé boot ba Ajénsia atu ho esforsu tomak atu dijitaliza sistema iha instituisaun Estadu tomak hanesan Governu, Parlamentu Nasionál, Tribunal Rekursu no Prezidénsia Repúblika sira sai kliente ba Ajénsia ne’e”, informa Diretór Ezekutivu.  

Nia esplika, TIC TIMOR hahú investe iha atividade lubuk ida tanba fiar katak, ho knar ne’ebé Ajénsia iha atu halo sistema ne’e lalais tanba to’o agora sei hatoman aan prosesu ne’ebé maka manual, ho ida ne’e papél importante atu muda tiha espetativa ida ne’e husi manual ba sistema ne’ebé dijitalizadu.   TIC TIMOR mós atinje ona projetu fíziku ne’ebé fornese ona konetividade iha munisípiu 12 no sentraliza ona dadus mai sentru dadus TIC TIMOR nian asesu sem internet tanba uza kabu Fibra Ótika Terrestre. Oecusse seidauk maibé tinan oin sei kobre territóriu tomak.

Xefe Ezekutivu ne’e mós husu ba IPB, atu bele halo aprosimasaun ho ministériu kompetente atu nune’e iha futuru impoin mós IPB iha sira eskopu atu bele halo konetividade. Kooperasaun ne’ebé maka halo ho IBP ba oin sei kontinua fó apoiu ne’ebé IPB presiza no ida ne’e hanesan konfiansa boot ida mai TIC TIMOR I.P ne’ebé iha duni badaen ba área informátika no tenta atu atrai rekursu di’ak atu mai servisu iha Ajénsia ida ne’e.

TIC TIMOR mós sei tenta nafatin atu kontinua fó apoiu di’ak liu no ida ne’e mós sai hanesan konfiansa ne’ebé maka mai ho espekula ne’ebé boot husi IBP mai TIC TIMOR. IPB inklui ona instituisaun 44 ne’ebé tama ona hamutuk ho Ajénsia no asegura mós objetivu Governu iha área informátika

Iha fatin hanesan, Prezidente IPB Acácio Cardoso Amaral, afirma sira nia parte haksolok tebes tanba bele mai asina nota entendementu ida ne’e, ho objetivu ba iha dezenvolvimentu portal website, hosting no servisu email.

Sira mós agradese ba apoiu tomak ne’ebé TIC TIMOR I.P fó ba IPB no akordu iha nivel tékniku sira.

Entretantu iha biban ne’e mós asina Service Level Agreement (SLA) ba website nian ne’ebé asina husi Diretór Divizaun Aplikasaun, Justo Fernandes ho Vise-Prezidente IPB, Paulo da Silva no SLA ba email ofisial ne’ebé asina husi Diretór Divizaun Infraestrutura, André Felix Marques ho Vise-Prezidente IPB, Paulo da Silva.  #MÉDIA TIC#