AJÉNSIA TIC TIMOR I.P., NO MESSK ASINA AKORDU SERVSIU TÉKNIKU BA ÁREA INFORMÁTIKA

Ajénsia Teknolojia Informasaun no Komunikasaun, sigla português (TIC) TIMOR I.P., no Ministériu Ensinu Superior Siénsia no Kultura (MESSK) asina akordu nível servisu tékniku ka Services Level Agreement (SLA) kona-ba servisu web hosting no prestasaun servisu ICT nian.

Akordu kona-ba web hosting services ho objetivu atu estabelese kooperasaun entre TIC TIMOR no MESSK iha área Teknolojia Informasaun no Komunikasaun hodi dezenvolve portal website iha âmbitu desiminasaun informasaun kona-ba atividade sira MESSK nian ba públiku.

Enkuantu kona-ba prestasaun servisu teknolojia informasaun no komunikasaun ho objetivu atu estabelese detallu servisu iha área Teknolojia Informasaun no Komunikasaun ka ICT services ne’ebé TIC TIMOR fornese ona ba MESSK.

Iha diskursu Vise-Diretór Ezekutivu TIC TIMOR I.P., Sr. Justo Fernandes ne’ebé hanesan mós Diretór Divizaun Dezenvolvimentu Sistema Aplikasaun hatete, asinatura ida ne’e, hanesan kontinuasaun hosi MoU ne’ebé hosi parte MESSK no TIC TIMOR asina ona iha fulan kotuk, no iha SLA ne’e rasik espesífikamente ba konkordánsia téknika ne’ebé kesi nível téknika entre MESSK no TIC TIMOR I.P. ninian.

 “Ita tenke ho planu ida sistema ida liuhosi sistema intergrade, no oinsá ita bele dezenvolve sistema sira ne’ebé maka dupla ba tinan sanulu ka bele mós tinan rua nulu, razaun hamenus duplikasaun entaun ita tenke konta mós TIC TIMOR iha laran hodi bele fó ideia no dalan liu hosi teknolojia ida ne’e,” nia esplika.

Lori Diretór Ezekutivu nia naran, agradese ba MESSK tanba konsidera ona TIC TIMOR nu’udar Ajénsia ne’ebé hatene lala’ok teknolojia agora no iha futuru.

Iha fatin hanesan Diretór Jerál Administrasaun no Finansas MESSK, Sr. Hernani Vieterbo da Costa Soares hatete, atu implementa responsabilidade ba kompeténsia ne’ebé maka mai hosi Ministériu ensinu superior estabelese ona planu no programa ne’ebé maka konsidera nu’udar solusaun sira importante no indespensavel atu hasoru dezafiu nasaun nian, iha kestaun kualidade ensinu superior nomós Rekursu Umanu.

“Kriasaun Base de dadus estatístika ninian ita halo hela levantamentu ba iha sítiu turístiku nomós sítiu sira ne’ebé maka ita konsidera hanesan patrimóniu kulturál ida, ne’e sei bele mós iha baze  dadus, estatístikamente ba iha promove no rezerva liu-liu atu dezenvolve sistema iha futuru, to’o ohin loron TIC TIMOR sai parseiru ida ba MESSK atu dezenvolve servisu tékniku hotu ne’ebé rekere utilizasaun Teknolojia Informátika ninian,” nia informa.

Ho tulun hosi TIC TIMOR nian estabelese no asegura ona funsionamentu portal Website Ministériu nian, ne’ebé permite promosaun ba atividade sira hotu ne’ebé Ministériu halo hanesan dezenvolvimentu jestaun Website, Instalasaun ba Email Ofisiál Eletróniku no asisténsia ba estabelesimentu ba estrutura SLA no Fibra Ótika ne’ebé sei dezenvolve hela iha baze de dadus.

Entretantu Asinatura SLA ba web hosting services nian asina hosi Diretór Divizaun Dezenvolvimentu Sistema Aplikasaun (DSA), Sr. Justo Fernandes no Diretrór Planeamentu Estatístika MESSK, Sr. Mafaldo Lopes Victor no SLA ba prestasaun servisu ICT  nian asina hosi Diretór Divizaun Infraestrutura TIC TIMOR I.P., Sr. André Felix Marques no Diretrór Planeamentu Estatístika MESSK, Sr. Mafaldo Lopes Victor no hetan partisipasaun másimu hosi Diretór Nasionál sira inklui tékniku sira hosi instituisaun rua ne’e. #MÉDIA TIC#