AJÉNSIA TIC TIMOR I.P. NO RAEOA ASINA NOTA ENTENDIMENTU BA KOOPERASAUN SERVISU IHA ÁREA TEKNOLOJIA

Ajénsia Teknolojia Informasaun no Kominilasaun sigla portugues (TIC) TIMOR I.P. asina Nota Entendementu ba kooperasaun servisu iha área teknolojia nian ho Rejiaun Administrativa Espesiál Oé-cusse Ambeno (RAEOA).

Kooperasaun ne'ebé TIC TIMOR I.P no RAEOA halo iha komponente tolu maka hanesan, atu forsenese solusaun téknika ba dezenvolvimentu investimentu infraestrutura Teknolojia Informasaun no Komunikasaun ba RAEOA, tuir mai RAEOA atu identifika no supervisiona ba deznvolvimentu infraestrutura relasiona ho TIK iha RAEOA ikus liu dezenvolve sistema aplikasaun esensiál ba dezenvolvimentu no suporta ba dezenvolvimentu kona-ba infraestrutura TIK no aspetu seluk tan.

Iha serimónia asinatura Nota Entendimentu ne'e, Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente hatete, TIC TIMOR hanesan Instituisaun Públiku ne'ebé harii iha VI Governu Konstitusionál liu hosi Dekretu-Lei númeru 29/2017. Ajensia ida ne’e harii, atu dezenvolve di’ak liu tan setór Teknolojia Informasaun no Komunikasaun hodi hafasil servisu ho kualidade di’ak ba instituisaun Governu sira hotu, hodi eleva koñesimentu no promove dezenvolvimentu sósiu ekonómiku, diversifikasaun ekonomia, bem-estar nomós kualidade moris sidadaun sira nian.

“Liu hosi estatutu RAEOA ne’ebé, hatuur katak objetivu sira-ne’ebé maka lei define kona-ba atribuisaun RAEOA nian maka hanesan “dezenvolvimentu umanu no kualidade moris nian liu-liu iha –edukasaun, saúde, hela-fatin, bee, saneamentu báziku, kultura, desportu no tempu livre – hodi fó-benefísiu ba abitante no komunidade sira,” esplika Diretór Ezekutivu.

TIC TIMOR I.P. intende papel importante  RAEOA nian, hanesan Rejiauan Espesial ne’ebé estabelese liu hosi Dekretu Lei númeru 03/2013, 18 Juñu, tuir saida maka altera tiha ona (“Lei n.0 3/2013”), ho direitu públiku tuir saida mak hakerek iha númeru 2 artigu 2.0 Lei n.0 3/2014; razaun ne’e kooperasaun Servisu Teknolojia, Informasaun no Komunikasaun importante tebes ba papel RAEOA  nian,  tanba TIC bele dezenvolve tuir nesesidade RAEOA nian iha kurtu, mediu no longu prazu hodi fasilita d’iak liu tan prestasaun servisu kona-ba dezenvolvimentu infraestrutura públika, umanu no ekonómiku hodi hatán ba  komunidade sira-nia di’ak no ba Timor-Leste tomak, la’ós haree de’it ba dezenvolvimentu iha investimentu infraestrutura teknolojia, informasaun no komunikasaun iha RAEOA maibé ba Timor-Leste tomak. Ajensia TIC TIMOR bele transforma servisu RAEOA nian ne’ebé iha agora mais elektróniku, liu hosi utilizasaun servisu Teknolojia, Informasaun no Komunikasaun.

Liu hosi servisu hamutuk ida ne’e, RAEOA mós sei kontribui ba esforsu TIC TIMOR I.P. nian servisu hodi hamenus gastu la-nesesáriu sira iha área Informátika, sentraliza no asegura dokumentu inklui informasaun iha Sentru-dadus Governu Elektróniku, fasilita asesu ba padraun Teknolojia no aplikasaun ne’ebé modernu, seguru, atualizadu, dezenvolvidu no aseguru hosi Timor-Oan rasik.

Xefe Ezekutivu esplika, ho asinatura Nota Entendimentu ida ne’e, kontinua ho akordu nivel servisu sira seluk no RAEOA hola parte hamutuk ho Ajensia Estadu hamutuk 56 ne’ebé maka agora dadaun uza hela servisu informátika iha TIC TIMOR nian no iha área oin-oin, tanba ne’e,i fiar katak, hahú hosi asinatura MoU ida ne’e, bele loke dalan ba kooperasaun iha área barak liu-tan iha futuru no liu hosi  servisu infármatika nian, ho kustu baratu liu.

Alende ne’e, Lider másimu TIC TIMOR I. mós agradese ba RAEOA fó ona konfiasa no fiar ba TIC TIMOR hanesan Tékniku Timor-oan, ne’ebé iha ona koñesimentu ne’ebé diak tebes hodi fornese solusaun Informatika.

Iha fatin hanesan, Prezidente RAEOA Sr. Arsenio Paixão Bano agradese ba TIC TIMOR tanba   kolabora ona ho RAEOA no hein katak, ho Nota Entendementu ne’ebé asina neineik  bele realiza.

Tanba RAEOA hakarak avansa ho buat di’ak balun no hein katak ida ne’e di’ak ba RAEOA.

Entretantu Nota Entendementu ne’e asina hosi Diretór Ezekutivu TIC TIMOR I.P. Sr. Roberto Caitano de Sousa Vicente no Prezidente RAEOA Sr. Arsenio Paixão Babo iha edifísiu RAEOA no hetan partisipasaun hosi Diretór Diresaun sira hosi TIC TIMOR, Diretór jerál sira hosi RAEOA nomós funsionáriu sira hosi instituisaun rua ne’e. #MÉDIA#TIC