ANE I.P., GARANTE AJÉNSIA TIC TIMOR I.P SEI FORNESE SERVISU DI’AK IHA ÁREA INFORMÁTIKA

Prezidente Autoridade Nasionál ba Eletrisidade (ANE) I.P., Ruben Jerónimo Freitas garante Ajénsia TIC TIMOR I.P., sei fornese servisu ne’ebé di’ak ba ANE I.P., iha área informátika tanba TIC TIMOR iha ona  esperiénsia servisu hamutuk ho instituisaun estadu  sira iha área refere.  

 “Ami husu apoiu ba TIC TIMOR atu fornese ba asisténsia sira liu-liu ba website, web hosting, email nomós aplikasaun eletróniku sira seluk tan,” dehan Prezidente ANE I.P., ba Jornalista sira hafoin serimónia asinatura Nota Entendimentu iha salaun EDTL Kaikoli.

Nia parte fiar katak, TIC TIMOR sei hatudu performe di’ak ba ANE I.P., hodi partilla informasaun sira iha setór eletrisidade ba komunidade sira.

Iha fatin hanesan, Vise-Diretór Ezekutivu Ajénsia TIC TIMOR I.P., Justo Fernandes hatete, kooperasaun entre ANE I.P., ho TIC TIMOR atu halo konkordánsia atu bele fahe tarefa servisu tanba ne’e, kona-ba hosting portal ANE I.P., nian hosi parte TIC TIMOR  maka sei halo manutensaun hodi fó apoiu tékniku ba servisu sira ne’ebé hosi parte ANE I.P. hosting iha TIC TIMOR no sei asegura n sistema refere  hodi bele moris iha 24 horas kada semana atu nune’e ema bele asesu iha rai laran nomós iha rai li’ur.

Nia dehan, hosi parte ANE I.P. sei haree ba ninia konteudu publikasaun sira ne’ebé iha relasaun ho ANE I.P. ninia servisu. Akordu servisu ne’e vale durante mandatu VIII Governu Konstitusionál no kona-ba kooperasaun nível tékniku laiha limitasaun bainhira iha servisu,” nia informa.  

“Atendementu servisu ne’ebé TIC TIMOR fornese la’ós de’it ba ANE I.P., maibé ba instituisaun estadu tomak. Ida ne’e servisu ne’ebé hahú hosi assessment ne’ebé iha no analiza rekezitu sira hosi instituisaun estadu inklui ANE I.P.,” nia salient.

Entretantu ho asinatura Nota Entendimentu ida ne’e, ba futuru sei kontinua ho akordu nível servisu sira seluk, ANE, I.P.,  hola parte hamutuk ho Ajénsia Estadu lima 50 resin ona ne’ebé maka agora daudaun uza hela servisu informátika iha TIC TIMOR no iha área oioin, tanba ne’e fiar katak, hahú hosi asinatura MoU ida ne’e, bele loke dalan ba kooperasaun iha área barak liu-tan iha futuru no liu hosi âmbitu servisu informátika nian. #MÉDIA TIC#