AUTORIDADE MUNISÍPIU BOBONARO SATISFAS HO KONEKSAUN REDE INTERNET NE’EBÉ OFERESE HUSI TIC TIMOR

Funsionáriu Autoridade Munisípiu Bobonaro sente satisfás ho instalasaun rede Fibra Ótika Terrestre (FOT) ne’ebé oferese husi Ajénsia Tecnologia da Informação e Comunicação (TIC) TIMOR I.P hodi fasilita servisu Munisípiu nian.
 
Tuir diretór Administrasaun no Finansas Munisípiu Bobonaro Elizeu Lopes de Araújo katak, koneksaun liña internet ne’ebé oras ne’e la’o hela ho nia velosidade ne’ebé lais tebes kompara ho tinan hirak liu ba, tanba ne’e nia sente satisfás ho rede ne’ebé TIC TIMOR oferese ba sira.
 
Nia informa, katan antes ne’e, bainhira to’o iha tinan ikus sempre mosu problema ho liña internet tanba difikulta servisu iha parte finansas nian liu-liu Sistema Freebalance maibé hafoin koneksaun rede (FOT) bele fasilita sira nia servisu.
 
“Uluk liña Fibra Ótika seidauk tama ami sente susar tebes tanba velosidade internet la’o neineik loos no ami tenke hala’o ami nia servisu iha Ministériu Finansas, maibé hafoin koneksaun ne’e iha ami sente kontente tebes tanba fasilita lalais ami nia servisu no ami sente hanesan tur iha Ministériu Finansas”, nia informa.
 
Iha biban ne’e mós, tékniku sira mós halo ligasaun fiu ba printer sira ne’ebé iha Munisípiu liu husi liña (FOT). #Média TIC#