DIRETÓR EZEKUTIVU AJÉNSIA TIC TIMOR I.P., NO EKIPA HALA’O AUDIÉNSIA HO PREZIDENTE RAEOA

Diretór Ezekutivu Ajénsia Teknolojia Informasaun no Komunikasaun, sigla português (TIC) TIMOR I.P., Sr. Roberto Caitano de Sousa Vicente ho ekipa hala’o audiénsia ho Prezidente Rejiaun Administrativa Espesiál OÉ-Cusse Ambeno (RAEOA) Sr. Arsénio Paixão Bano ho nia ekipa iha edifísiu RAEOA.

Objetivu hosi sorumutu ne’e, atu halo introdusaun kona-ba servisu Ajénsia TIC TIMOR nian atu nune’e karik iha oportunidade RAEOA bele halo kooperasaun servisu ho TIC TIMOR iha área informátika.   

Iha enkontru ne’e, Diretór Diresaun Dezenvolvimentu Sistema Aplikasaun Sr. Justo Fernandes, halo aprezentasaun kona-ba papél TIC TIMOR I.P. nian no atualiza lala’ok servisu TIC TIMOR nian tuir misaun no vizaun ne’ebé Ajénsia iha, bazeia ba dekretu lei númeru 29/2017 inklui progresu servisu ne’ebé TIC TIMOR atinje ona liu-liu kona-ba dezenvolvimentu sistema aplikasaun nomós infraestrutura rede ne’ebé konekta ona ba instituisaun estadu sira no munisípiu 12 inklui RAEOA no Ataúro ne’ebé sei  kobre hotu iha futuru.

Alende ne’e, ekipa Diresaun Identidade Úniku mós halo aprezentasaun kona-ba programa ID Úniku no progresu servisu ne’ebé oras ne’e dadauk la’o hela.

Iha biban ne’e, Prezidente autoridade RAEOA Sr. Arsénio Paixão Bano agradese ba TIC TIMOR, ba servisu ne’ebé Ajénsia ne’e, hala’o ona no sira mós iha interese ba servisu ne’ebé TIC TIMOR halo tanba durante ne’e RAEOA asesu ba sistema Freebalance no Dalan Ba Futuru ho liña internet ne’ebé lentu tebes.

Sira nia parte mós husu TIC TIMOR, atu halo assessment lalais hodi bele identifika infraestrutura ne’ebé RAEOA iha atu nune’e iha tempu badak bele uza servisu ne’ebé fornese hosi TIC TIMOR.

Entretantu enkontru ne’e rasik partisipa mós hosi, Diretór Diresaun Infraestrutura Sr. André Felix Marques, Diretora Diresaun Planeamentu no Finansas Sra. Maria da Frosa H. Marques, Diretór Servisu Korporativu, Sr. Juvenal Soares do Carmo Lay, ekipa hosi Diresaun Identidade Úniku nomós Diretores sira hosi RAEOA. #MÉDIA TIC#