DIRETÓR EZEKUTIVU AJÉNSIA TIC TIMOR I.P PARTISIPA IHA LANSAMENTU PORTÁL OFISIÁL APC

Diretór Ezekutivu Ajénsia Teknolojia Informasaun no Komunikasaun sigla portugues, (TIC) TIMOR I.P. Sr. Roberto Caitano de Sousa Vicente, partisipa iha serimónia lansamentu portál ofisiál Autoridade de Proteҫao Civíl (APC) nian ne’ebé maka dezenvolve hosi Ajénsia TIC TIMOR I.P..

Objetivu hosi dezenvolvimentu portal refere, atu hakbesik servisu APC nian ba komunidade no parseiru sira kona-ba atividade no programa sira liu hosi desiminasaun informasaun.

Iha  serimónia  lansamentu ne’e, Diretór Ezekutivu TIC TIMOR I.P. Sr. Roberto Caitano de Sousa Vicente, agradese ba APC ne’ebé fó ona konfiansa ba TIC TIMOR hodi dezenvolve portal ofisiál ne’e no TIC TIMOR prontu atu fó apoiu iha área informátika.

Xefe Ezekutivu informa, TIC TIMOR hanesan Ajénsia ne’ebé maka estabelese tuir dekretu lei númenru 19/2017 ho nia objetivu prinsipál atu ajuda insituisaun estadu sira hodi dezenvolve sistema informátika sira hanesan, website, konetividade no seluk tan.TIC TIMOR mós apoiu insituisaun estadu tomak liu-liu iha  área informátika nian inklui  fó formasaun ba pesoál tékniku hosi insitusaun estadu sira.

Alende dezenvolve website ne’ebé maka oferese ba APC, TIC TIMOR mós fó formasaun ba pesoál tékniku sira oinsá atu jere website refere.

“Durante ne’e, TIC TIMOR mós apoiu ona instituisaun estadu hamutuk 56 ne’ebé hodi uza  servisu ne’ebé fornese hosi TIC TIMOR . Hanesan mós  planu estratéjiku  Timor Dijitál 2023-2032 ne’ebé  ho objetivu atu sentraliza Sistema informátika Governu nian iha fatin ida hodi dijitaliza servisu Governu nian ba forma dijitál atu nune’e, setór privadu no sidadaun sira bele asesu ho tempu ne’ebé maka lais liu. TIC TIMOR mós iha prosesu atu konklui projetu ne’ebé  atu oferese identidade úniku ba populasaun tomak,” informa Diretór Ezekutivu.

Iha fatin hanesan, Sekretáriu Estadu Protesaun Civíl (APC) Sr. Joaquim Gusmão dos Reis Martins hatete, ho apoiu ne’ebé TIC TIMOR fornese, APC konsege ona estabelese portal ofisiál hodi bele rekolla informasaun sira. Website ida ne’e, sei kompleta parseria APC ho UNDP ba iha projetu baze dadus dezastre Timor-Leste nian.

“APC mós sei kooperasaun di’ak liu tan ho TIC TIMOR liu hosi manutensaun ba portál ne’ebé TIC TIMOR fornese ona,” dehan Sdekretáriu Estadu.  

Website ne’e rasik lansa direta hosi Sekretáriu Estadu Protesaun Civíl Sr. Joaquim Gusmão dos Reis Martins akonpaña hosi Diretór Ezekutivu TIC TIMOR I.P. Sr. Roberto Caitano de Sousa Vicente, Prezidente RTTL EP. Sr. José António Belo, Reprezentanste Polícia Nasionál nomós reprezentante hosi UNDP.

Iha biban ne’e, APC mós asina Nota Entenzdementu ho RTTL E.P ba koopersaun servisu entre instituisaun rua ne’e.

Entretantu serimónia ne’e, realiza hosi APC iha Auditóriu Akademia Policia Komoro. #MÉDIA#TIC