DIRETÓR EZEKUTIVU AJÉNSIA TIC TIMOR I.P., PARTISIPA SOSIALIZASAUN PROGRAMA IDENTIDADE ÚNIKU IHA UNDIL

Diretór Ezekutivu Ajénsia Teknolojia Informasaun no Komunikasaun, sigla português (TIC) TIMOR I.P., Sr. Roberto Caitano de Sousa Vicente partisipa iha sosializasaun programa Identidade Úniku (ID ÚNIKU) ba Korpu Dosente, Funsionáriu no Senadu hosi Universidade Dili (UNDIL).

Sosializasaun programa Identidade Úniku ne’e ho objetivu atu, famália boot UNDIL hotu bele iha koñesimentu di’ak kona-ba saida maka ID Úniku ho nia lala’ok servisu no vantajen inklui impaktu ba servisu administrativu hotu iha Timor -Leste. Ho ida ne’e, marka tan pasu foun ida iha esforsu atu alkansa Programa VIII Governu Konstitusionál nian programa ba iha Governu Eletróniku ka E-Government.

 ID Úniku atu fornese mekanizmu seguru, protejidu no konfiavél ba sidadaun hotu atu bele Verifika sira nia autentisidade Identidade ho servidór sira.

Iha abertura ba atividade sosializasaun ne’e, Xefe Ezekutivu hatete, TIC TIMOR hanesan Instituisaun Públiku ne’ebé harii iha VI Governu Konstitusionál liu hosi Dekretu-Lei númeru 29/2017 iha 29 Agostu 2017 ne’ebé ho baze atu dezenvolve di’ak liu tan setór Informasaun, Komunikasaun no Teknolojia (sigla ingles ICT) hodi hafasil servisu ho kualidade di’ak ba Governu no sosiedade tomak.

Tanba ne’e, TIC TIMOR hahú nia papél hodi lidera implementasaun programa ba iha Governu Eletróniku hanesan, Programa Identidade (ID) Úniku ne’ebé hanesan, komponente fundamental ba implementasaun Planu Dezenvolvimentu Estratéjiku (PEDN 2011-2030), Kapítulu 5, “Kuadru Institusionál atu hadi’a teknolojia informasaun no komunikasaun hodi apoiu Governu konjuntu no inisiativa Governu Eletróniku (E-government).”

“Identidade Úniku sai mós hanesan, solusaun ida hosi Programa Reforma Administrativa 2019 to’o 2023, ho nia área prioridade VIII Governu nian (prioridade no. 6) hanesan deklara iha semináriu nasionál jornada orsamentál ba OJE 2022 no informa mós iha reuniaun Koordenasaun Parseiru Dezenvolvimentu sira,” dehan Xefe Ezekutivu.

Diretór informa katak, projetu ne’e jere hosi TIC TIMOR I.P., liu hosi Diresaun ID Úniku nian nu’udar entidade transitória.  Durante implementasaun projetu sei halo preparasaun hodi muda ba Ajénsia IDU rasik iha futuru.

Nafatin rona hosi sidadaun sira kona-ba oinsá bele implementa projetu IDU ho susesu, liu hosi End-user survey ne’ebé hala’o ona liu hosi kolaborasaun servisu ho Banku Mundial (world bank) ho nia kompañia peskizadora Censover Fobo, Lda.

Iha fatin hanesan, Vise-Reitór UNDIL, Sr. Hugo Lourenço, apresia ba TIC TIMOR ne’ebé maka sai nu’udar Ajénsia implementadór ba inisiativa ID Úniku no nia parte enkoraja Dosente, Funsionáriu no Estudante UNDIL atu partisipa másimu iha workshop ne’e to’o remata hodi hetan koñesimentu jerál ba inisiativa hosi implementasaun ba programa ida ne’e.  

Alende ne’e, Jestora Identidade Úniku Sra. Elisabeth Baptista mós halo aprezentasaun kona-ba jornada implementasaun ID Úniku nomós aprezentasaun kona-ba matéria sosializasaun programa ID Úniku.

Iha biban ne’e, iha mós sesaun pergunta no resposta hosi partisipante sira.

Entretantu sosializasaun ne’e, organiza hosi Diresaun Identidade Úniku no loke hosi Vise- Reitór UNDIL, Sr.  Hugo Lourenço akompaña hosi Diretór Ezekutivu Ajénsia TIC TIMOR I.P., Sr. Roberto Caitano de Sousa Vicente, iha Kampus UNDIL Kintal boot.  #MÉDIA#TIC