DIRETÓR EZEKUTIVU AJÉNSIA TIC TIMOR SAI ORADOR IHA SEMINÁRIU KONA-BA “HASA’E EFETIVIDADE PÚBLIKU LIU HUSI DESENTRALIZASAUN INOVASAUN TEKNOLOJIA”

Dili, 07 de Junho de 2024 - Diretór Ezekutivu Ajénsia TIC TIMOR I.P., Sr. Venâncio Pinto S. Kom, sai hanesan oradór iha semináriu kona-ba “Hasa’e Efetividade Públiku Liu husi Desentralizasaun Inovasaun Teknolojia” ne’ebé realiza husi Universidade da Paz (UNPAZ).

Durante seminário, lider máximu Ajénsia TIC TIMOR I.P. ne’e halo aprezentasaun kona-ba inovasaun teknolojia ba atendimentu públiku, ne’ebé sai hanesan fator importante tebes ba nasaun Timor-Leste.  

“Koalia kona-ba Inovasaun Teknolojia ba Atendementu Publiku, momentu ida ne’ebe oportunu tebes ba Timor-Leste atu hahú dezemvolve an lori tama ba era revolusaun industrial 4.0 no iha futuru sei tama ba industrial 5.0, nudar era tekonolojia digitál hó nia mundasan ne’ebe signifikante tebes iha era global Teknolojia mundu nian”.

Superior ne’e mós halo introdusaun kona-ba papél husi Ajénsia TIC TIMOR I.P. ne’ebé hala’o ninia kna’ar  hanesan implementador Polítika kona-ba Teknolojia, Informasaun no Komunikasaun (TIK) iha termus número (2.8)   no (6.7), kona-ba Governu Eletroníku liu husi programa IX Governo konstituisional, atribui papél importante no imperativu ida ne’e ba Ajénsia TIC TIMOR I.P.  

 

Diretór Ezekutivu esplika tan katak, atendimentu públiku hó kualidade liu husi inovasaun teknolojia ne’e, iha pontus importante ha’at ne’ebe krusial tebe, mak hanesan; Literasia Dijitál, Dezenvolve Abilidade Téknika, Adozaun Plataforma Dijitál, Koñesimentu Kona-Ba Seguransa Sibernétika nian.

 

Vantazen husi inovasaun atendementu públiku iha era digitál, ne’e sei fasilita tebes ema hotu hó forma independente, sein klase ka diskriminasaun tanba ema hotu sei hetan atendementu hanesan, sein diskriminasaun ka la-iha ema ida sei hela iha kotuk ka ignoradu. Atendementu publiku ne’e mos sei sai fásil liu tan, tanba sidadaun sira bele hetan asessu iha ne’ebe deit.  

         

Em prinsípiu, industria 4.0 no 5.0 nudar parte transformasaun digital. Époka industria ida ne’e bele realiza otomátikamente iha kualker aparllu (device) ne’ebe nudar sistema interligadu, entre sistema ida hó sistema seluk, ne’ebe iha relasaun servisu ba malu. 

Ho nune’e implementasaun industria 4.0 no 5.0 espera katak, bele hasa’e produktividade no fasilita funsaun kontrolu, hó forma ida ne’e, parte hirak ne’ebé responsável ba atendementu públiku, tenke esforsu hodi adapta hó inovasaun ne’ebé existi iha era digitál nian. 

  

Moris iha faze teknolojia digitál, hanesan ita la’o iha treadmil, ne’ebé ita la sente evolusaun no avansu teknologia ne’ebe kontinua dezenvolve loron ba loron. Bainhira ita falha iha inovasaun no la adapta ita nia an hó kondisaun evolusaun hirak ne’ebe existi, mak ita sei sai nasaun ida ne’ebe hela iha kotuk kona-ba digitalizasaun nian. 

Hó kestaun ne’ebe refere ona, hau iha prazer atu apela ba Ita hotu atu konsiente, responsivo no tenke halo esforsu atu kontinua  buka halo inovasaun hodi  enfrenta kualker situasaun ne’ebe sei mosu iha futuru. 

Entretantu, atividade seminariu ne’e partisipa mós husi Vise-Reitor Asuntu Mestradu, Dr. Martinhos Nahac Lino, oradór Dr. Arcanjo de Jesus Leite, dosente sira inklui estudantes universitaríu husi Universidade da Paz (UNPAZ). 

(Média TIC)