DIRETÓR EZEKUTIVU TIC TIMOR HAMUTUK HO MEMBRU KTE HALA’O ENKONTRU HODI DISKUTE KONA-BA PROGRAMA IDENTIFIKADOR ÚNIKU (UNIQUE ID)

Diretór Ezekutivu Ajénsia Tecnologia da Informação e Comunicação (TIC) TIMOR I.P., Roberto Caitano de Sousa Vicente, hamutuk ho membru Komisaun Téknika Eventual (KTE) sira seluk, hala’o enkontru hodi diskute kona-ba oinsá, atu prodúz estratéjia integradu ida ba implementasuan sistema Identifikador Úniku.

 

KTE estabelese liu husi Resolusaun Governu númeru 19/2020 iha fulan Marsu liu ba, ho nia knar atu analiza relatoriu resultadu estudu preparatóriu ne’ebe existe ona no prepara estratejia integrada sistema Identifikador Úniku inklui ho planu detallu implementasaun no nia orsamentu atu submete ba Konsellu Ministrus (KM). KTE iha tempu máximu fulan neen (6) atu kompleta knaar ne’ebé  iha .

 

KTE kompostu husi orgaun sanulu  (10) maka hanesan, Ministériu Reforma Legislativa Asunto Parlamentar  (MRLAP) ne’ebé agora muda fali ba Presidência do Concelho de Ministros (PCM), Ministériu Justisa (MJ), Ministériu Finansas (MF), Ministériu Solidariedade Sosiál no Iinkluzaun (MSSI), Ministériu Edukasaun Juventude no Desportu (MEJD), Ministériu Saúde (MS), Ministériu Administrasaun Estatál (MAE), Ministériu Interior (MI), Komisaun Funsaun  Públika (KFP) no TIC TIMOR rasik.

 

Husi Rezolusaun hanesan, Konsellu Ministru nomeia Diretór Ezekutivu TIC TIMOR, Roberto Caitano de Sousa Vicente hodi lidera komisaun teknika refere. Komisaun sei hetan apoiu administrativu no sekertariadu husi TIC TIMOR no apoiu tekniku husi Diresaun Nasional Registu Notariadu (DNRN) husi Ministeriu Justisa, PCM no konsultor external ne’ebé komisaun bele asesu.

 

 Iha enkontru ida ne’e , Xefi Ezekutivu TIC TIMOR hatete, ida ne’e enkontru Komisaun Téknika Eventual nian ba dahuluk hanesan introdusaun ida atu ekipa fahe informasaun ba malu no kompriende didi’ak kna’ar komisaun nian.  Nune’e mós atu deside hamutuk planu asaun ba atividade sira ne’ebé komisaun sei hala'o iha fulan neen nia laran.

 

Iha biban ida ne’e, representante TIC TIMOR nian, halo aprezentasaun kona-ba inisiativa Identifikador Úniku no fahe informasaun kona-ba atividade krítiku balun ne’ebé realiza ona durante ne’e.

 

Alende ne’e, KTE diskute mós kona-ba se maka sai Jestór iha Sekretariadu Identifikador Úniku ne’e no ikus mai hili reprezentante ida husi TIC TIMOR I.P  hodi sai Jestora ba programa ne’e. #Média TIC#