DIRETÓR EZEKUTIVU TIC TIMOR I.P APREZENTA PROPOSTA OJE 2022 BA KROP

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente akompaña husi Diretora Administrasaun no Finansas, Maria da Frosa Marques ho ekipa, aprezenta proposta Orsamentu Jerál Estadu tinan fiskál 2022 nian ba Komisaun Revizaun Orsamentu Polítika (KROP), iha edifísiu Ministériu Finansas Aitarak Laran. Objetivu husi reuniaun ne’e, atu haree kona-ba elaborasaun versaun final proposta lei Orsamentu Jerál Estadu (OJE) tinan fiskál 2022 nian, halo verifikasaun ba alokasaun, estratéjia rekursu ba submisaun orsamentál ho forma atu atinje kompromisu no objetivu ne’ebé iha dokumentu estratéjiku sira inklui kapasidade ezekusaun no planu ba tinan 2022. Tetu proposta orsamentu TIC TIMOR nian ba tinan 2022 ho montante $ 5 milloens ne’ebé fahe ba kategoria bens servisu no kapitál menór inklui orsamentu adisional ho montante $ 3 milloens. Enkuantu ezekusaun orsamentu TIC TIMOR tinan 2021 to’o agora atinje ona 76,8%. Entretantu, reuniaun Komité Revizaun Orsamentu Polítika ne’e, prezide husi S.E. Ministru Finansas, Rui Augusto Gomes, akompaña husi Vise-Primeira- Ministra Armanda Berta dos Santos, Ministru Prezidénsia Konsellu Ministru, Ministru Asuntu Ekonómiku, Ministru edukasaun Juventude no Desportu, Ministru Administrasaun Estatál, Sekretária Estadu Igualdade Jéneru no Komisária ba Labarik. #MÉDIA TIC#