DIRETÓR EZEKUTIVU TIC TIMOR I.P HALA’O ENKONTRU HO MPM KONA-BA OINSÁ FÓ APOIU IHA ÁREA INFORMÁTIKA

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa, hala’o enkontru ho Ministro do Petróleo e Minerais (MPM), Victor da Conceição Soares ho nia ekipa, hodi diskute oinsá TIC TIMOR fó apoiu ba MPM iha área informátika.
 
Tanba tuir lei ne’ebé iha, Ajénsia ne’e, iha nia papél importante atu halo sentralizasaun ba rekursu informátika iha Governu tomak. TIC TIMOR mós kontinua habelar informasaun no husu mós apoiu polítika husi ministériu sira atu nune’e dudu sentralizasaun dadus ba oin.
 
Tuir Diretór Ezekutivu katak, realidade ne’ebé iha, durante ne’e investe orsamentu ho kustu ne’ebé boot ba investimentu informátika, maibé estadu seidauk hetan retornu.
 
Ho ida ne’e, karik MPM hasoru problema velosidade internet ne’ebé tenke fó solusaun, TIC TIMOR iha nia papél oinsá atu hasai tiha kompleksidade ne’e, husi ministériu atu nune’e foku de’it ba prestasaun servisu.
 
Iha biban ne’e, halo mós aprezentasaun kona-ba servisu ne’ebé Ajénsia atinje ona inklui planu ne’ebé sei halo iha futuru.
 
Ho nune’e, Ministro do Petróleo e Minerais (MPM), Victor da Conceição Soares  hatete, kuaze ministériu hotu-hotu hetan ona apoiu husi TIC TIMOR  tanba ne’e,  nia parte sente interesante tebes ba sira nia ministériu atu fasilita komunikasaun ne’ebé efisiénsia no efikásia hodi poupa tempu inklui hamenus kustu tanba ida  ne’e hanesan oferta ida.
 
Entretantu enkontru ne’e, hala’o iha edifísiu MPM Bebora Dili. #MÉDIA TIC#