DIRETÓR EZEKUTIVU TIC TIMOR I.P HALA’O ENKONTRU KOORDENASAUN SERVISU HO SEKRETÁRIU JERÁL MNEK

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa tékniku, hala’o enkontru koordenasaun servisu ho Sekretáriu Jerál Ministériu Negósiu Estranjeiru no Kooperasaun, Jorge Trindade Neves de Camões, ho nia ekipa, iha Gabinete Sekretáriu Jerál MNEK, Praia dos Coqueirros. Objetivu husi sorumutu ne’e, atu ko'alia kona-ba oinsa TIC TIMOR fo apoiu iha área informátika liu-liu kona-ba kriasaun sistema baze de dadus ba MNEK atu bele asegura dadus ministériu nian. Iha enkontru ne’e, Sekretáriu Jerál hatete, MNEK hakarak koopera ho TIC TIMOR tanba Ajénsia ne’e, hanesan instituisaun Governu nian no iha tempu badak nia laran bele iha baze de dadus atu bele prezerva dadus sira ho di’ak. Alende ne’e, Diretór Ezekutivu TIC TIMOR, agradese ba MNEK tanba bele fó fiar atu dezenvolve sistema sira. Ida ne’e, maka TIC TIMOR nia papél atu fó solusaun ba instituisaun estadu sira nomós ba órgaun soberania haat ne’e, atu hafasil liu sira nia servisu. Ho ida ne’e sai hanesan pasu ne’ebé pozitivu atu bele korresponde ba nesesidade MNEK nian. MNEK mós sai ona hanesan parseiru TIC TIMOR nian ba servisu informátika hanesan E-mail ofisial no seluk tan. Iha biban ne’e, parte rua mós diskute kona-ba oinsá atu dezenvolve sistema informátika ba ministériu refere, no sei iha enkontru tékniku tuir mai atu bele hatene liu tan saida maka TIC TIMOR sei apoia ba MNEK. #MÉDIA TIC#