DIRETÓR EZEKUTIVU TIC TIMOR I.P HALA’O ENKONTRU REGULAR HO PRIMEIRU- MINISTRU HODI RELATA PROGRESU SERVISU

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, hala’o enkontru regular ho S.E. Primeiru-Ministru Sr. Taur Matan Ruak, hodi relata progresu servisu Ajénsia TIC TIMOR nian, espesífikamente kona-ba ezekusaun orsamentu TIC TIMOR nian nomós predisaun ezekusaun orsamentu to’o tinan ne’e remata. “To’o agora TIC TIMOR nia ezekusaun ladún tuir espetativa ne’ebé maka iha, liu-liu ba iha trimestre daruak nian loloos tuir metas ne’ebé maka iha, tenke atinje 50% maibé realidade ami seidauk to’o iha ne’ebá ami foin to’o por volta de 25% husi ezekusaun tanba ne’e, agora dadauk tenta hela atu aselera ezekusaun tuir metas maibé, posivelmente sei la to’o tarjetu ne’ebé maka define,” informa Xefe Ezekutivu ba jornalista sira, hafoin hasoru malu ho S.E. primeiru-Ministru iha Palásiu Governu. Diretór Ezekutivu ne’e informa katak, TIC TIMOR hanesan Ajénsia ne’ebé espesífiku ba iha área teknolojia nian no investimentu ne’ebé iha mós foka liu ba investimentu teknolojia nian. Iha projetu balun ne’ebé maka to’o agora seidauk atinje tuir espetativa tanba iha lakunas balun ne’ebé maka atraza ituan no seidauk bele finaliza tuir espetativa tanba ne’e, labele finaliza hodi kontribui ba ezekusaun ne’ebé maka la’o ladún di’ak iha Ajénsia. Relasiona ho planu Governu nian ba tinan oin mós la sees husi ezekusaun ne’ebé iha, signifika katak, haree ba ezekusaun to’o tinan remata maka TIC TIMOR labele atinje metas ne’ebé iha entaun sei fó impaktu ba orsamentu ne’ebé atribui iha tinan 2022. Tanba ne’e, S.E. Primeiru-Ministru Sr. Taur Matan Ruak, fó instrusaun ba TIC TIMOR atu tenta la’o tuir dalan ne’ebé maka iha, atu bele ezekuta tuir metas ne’ebé maka iha trimestre primeiru hodi haree fila fali oinsá atu bele atribui tuir metas nune’e labele iha implikasaun boot kona-ba redusaun kustu orsamentu TIC TIMOR nian iha tinan tuir mai. Entretantu Xefe Governu mós informa katak, iha semana oin, iha mós jornada orsamentál tanba ne’e, presiza mós atu haree planu orsamentu ba tinan 2022 nian. Ida ne’e mós sai sasukat oinsá kapasidade TIC TIMOR nian atu bele ezekuta orsamentu ne’ebé maka iha nomós liga ba planu annual ne’ebé maka TIC TIMOR sei prepara iha 2022 nian. #Média TIC#