DIRETÓR EZEKUTIVU TIC TIMOR I.P HALO APREZENTASAUN KONA-BA SERVISU TIC NIAN IHA RETIRU MEMBRU GOVERNU BA DARUAK

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente halo aprezentasaun kona-ba servisu TIC TIMOR I.P nian ne’ebé liga ba Governu Eletróniku, iha retiru membru Governu ba daruak ne’ebé lidera husi Primeiru Ministru Taur Matan Ruak ne'ebé hala’o iha sala auditoria Ministeriu Finansas, Aitarak Laran, Dili.
 
Objetivu husi aprezentasaun ne’e, atu fahe informasaun ba membru Governu sira atu kompriende loloos servisu saida maka Ajénsia ne’e halo no planu ne’ebé maka sei halo.
 
Ajénsia ne’e nia papél, atu implementa polítika liga ba Information Communications Technology (ICT) hodi prepara teknolojia ne’ebé ótimu inklui aplikasaun, infraestrutura nomós rede Fibra Ótika (FO) bazeia ba prioridade nasionál.
 
TIC TIMOR sai mós nu’udar ajénsia implementador ba inisiativa Governu Eletróniku, atu promove Governu modernu ne’ebé eletrôniku, integradu, interoperável, acessível, simplifikadu no menus burokrátiku.
 
TIC TIMOR haree ba internet no intranet Governu nian no fó mós asesoria ba entidade govermental tomak. TIC TIMOR kompleta ona koneksaun rede Governu nian ho Fibra Ótika Terrestre (FOT) ba   munisípiu 12.
 
 TIC TIMOR, iha prinsípiu timorizasaun, ho nune’e 97% husi funsionáriu timor oan hotu liu-liu iha parte sira hanesan, aplikasaun, infraestrutura  maioria iha ona 43% balansu jéneru iha área programasaun inklui iha parte tékniku.
 
Ajénsia, kompleta ona sentru dadus nasionál ba Governu Eletróniku hanesan, hosting website, fornese servisu sira hanesan Email, domain name no hosting. TIC TIMOR mós agora dadauk ajuda liña ministerial sira no Ajénsia Governu sira hodi dezenvolve website sira tuir nesesidade ministériu sira nian nomós aplikasaun balun ne’ebé hakarak dezenvolve, parte aplikasaun prontu atu kolabora.
 
TIC TIMOR mós fó suporta ba liña ministerial sira bainhira, iha difikuldade kona-ba utilizasaun sistema. Ajénsia ne’e, prontu atu fornese no fó mós treinamentu ba liña ministériu balun ne’ebé husu atu tuir treinamentu kona-ba IT.
 
TIC TIMOR mós halo ona aprezentasaun ba ministériu barak ho prosesu atu halo estudu planeamentu ida kona-ba oinsá bele fó servisu ba sira.
 
Iha mós program kona-ba Unique ID ne’ebé haree ba identifikasaun ID Úniku sidadaun sira nian hahú husi moris to’o mate.
 
Iha biban ne’e Diretór Ezekutivu mós husu ba Governante sira, atu labele rai dadus iha ema seluk nia liman maibé presiza sentraliza iha fatin ida atu nune’e bele kontrola dadus hirak ne’e.
 
TIC TIMOR mós husu apoiu polítika husi ministériu hotu atu servisu hamutuk inklui servisu hodi fó solusaun ne’ebé di’ak.
 
Ho nune’e, Primeiru Ministru Taur Matan Ruak hatete, tenke sentraliza dadus no integra dadus tanba importante tebes.
 
Tanba ne’e Xefe Governu ne’e afirma, presiza tau dadus sira iha fatin ne’ebé seguru atu nune’e labele lakon. #MÉDIA TIC#