DIRETÓR EZEKUTIVU TIC TIMOR I.P PARTISIPA IHA SERIMÓNIA LANSAMENTU PERFURASAUN MINA-MATAN ÁREA RAI-MARAN

Kovalima, loron-27, fulan-Outubru, tinan-2021

Diretór Ezekutivu Ajénsia Teknolojia Informasaun no Komunikasaun (TIC) TIMOR I. P., Roberto Caitano de Sousa Vicente, Partisipa iha Serimónia Lansamentu Perfurasaun Mina-Matan iha área Rai-Maran, Posu Administrativu Feto Kmaus, Munisípiu Kovalima.

Lansamentu ida-ne’e, Primeiru-Ministru, Taur Matan Ruak, mak halo lansamentu direta. Iha serimónia ne’e PM  hateten, Timor-Leste nia dezenvolvimentu ba konstrusaun ninia aspetu barak maibé nasaun Timor-Leste ninia konstrusaun importante iha aspetu tolu.

“Hanesan ita hotu hatene ita-nia Nasaun iha faze ida dezenvolvimentu konstrusaun Estadu, ema dala barak ko’alia konstrusaun Estadu, ita bele haree iha aspetu barak maibé ita konsentra ba aspetu tolu importante mak estabilidade, seguransa, reseita no dezenvolvimentu hodi fó-benefísiu ba sidadaun sira maibé kuandu buat tolu ne'e la iha Estadu la bele moris, estabilidade no seguransa la iha dezenvolvimentu la bele la’o, dezenvolvimentu la’o tenke iha reseita maibé se reseita iha mak uza ladi’ak Nasaun sei la la’o ba oin,” Informa Primeiru-Ministru iha ninia diskursu.

Entretantu, Xefe Governu mós husu ba Administradór Munisípiu Kovalima atu mantein nafatin mobilizasaun ida-ne'e hodi fó-apoiu ba kompañia sira, ne’ebé nu’udar operadór, Timor Resources ho Timor Gap tanba sira sakrifika ona sira-nian an, tempu, vida ba ema hotu nia di’ak, afirma PM.

Iha atividade ne’e, Diretór Ezekutivu kontinua akompanha lori ai-funan ba monumentu Masakre Setembru Negru 1999 nian iha Suai Kovalima hodi kari ai-funan ba ÉroI no Mártir sira Libertasaun Nasionál nian.

Hafoin ramata kari ai-funan Diretór Ezekutivu kontinua akompaña Serimónia lansamentu formál ba iha Perfurasaun Mina-Matan iha área Rai-Maran hafoin tinan 50, iha Posu Feto Kmaus, Munisípiu Kovalima.

Iha serimónia lansamentu ne’e, partisipa mós hosi Tenente Jenerál Lere Anan Timur, Majór Jenerál Falur Rate Laek, Brigadeiru-Jenerál Aluk, Brigadeiru-Jenerál Maunana, Brigaderiu-Jenerál Sabika Besi-kulit, Brigadeiru Jenerál Calistro Santos Coliati, Prezidente CCLN, Vidal de Jesus, Riak Leman, Ministru Petróleu no Minerál (MPM), Víctor da Conceição Soares,Vise-Ministru ESTATAL, Prezidente AMRT, Prezidente IPJ I.P., TIMOR GAP E.P.Vice Komandante Polísia Nasionál, Komandante Polísia Munisípiu Suai Kovalima, Reprezentante Veteranu sira hosi Munisípiu 12, Administradór Munisípiu Ainaru, Administradór Munisípiu Suai Kovalima, Líder Komunitaria no Komunidade Povu Suai Kovalima tomak. #Media #TIC