DIRETÓR EZEKUTIVU TIC TIMOR VIZITA MUNISÍPIU MANATUTO, BAUCAU, LAUTÉM NO VIQUEQUE HODI HAREE DIRETA SERVISU AJÉNSIA NIAN

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente hala’o vizita ba munisípiu Manatuto, Baucau, Lautém no Viqueque hodi fahe informasaun ba autoridade munisípiu sira, kona-ba ezisténsia Ajénsia nian, ne’ebé ho nia papél atu implementa Governu Eletróniku.
 
Iha biban ne’e mós, haree diretamente kondisaun servisu pesoál destakadu TIC TIMOR I.P nian iha munisípiu.
 
Durante iha vizita ne’e, Xefe Ezekutivu hatete, Ajénsia nia papél atu haree ba implementasaun Governu eletróniku nune’e, autoridade munisípiu sira bele hatene no haree oportunidade ne’ebé iha, hodi oferese servisu ne’ebé efikás liu no redús burokrasia.
 
Nia dehan, Instituisaun Públiku ne’e,  kompleta ona servisu barak, liu husi konetividade liña internet  ba  munisípiu 12  no agora iha ona  koneksaun direta ba iha nasionál nomós munisípiu ba munisípiu  hodi fahe informasaun ba malu.
 
Sorumutu ne’e mós, atu rona saida maka autoridade munisípiu sira sei halo iha futuru. Karik durante ne’e, servisu iha prosesu manual. Ho ida ne’e, tuir autoridade munisípiu sira nia nesesidade, Ajénsia sei dezenvolve tipu aplikasaun ne’ebé responde ba servisu ne’ebé durante ne’e autoridade munisípiu sira halo.
 
“Ba oin, tenta atu otimiza sistema sira hanesan tratamentu ba dokumentu importante sira hanesan BI, Pasaporte no karta kondusaun liu husi konetividade ne’ebé iha. Ho ida ne’e, bele dehan servisu la presiza konsentra iha nasionál maibé bele delega ona servisu ne’e mai sira nia ajente iha edifísiu nune’e bele hala’o sira nia servisu”, dehan Xefe Ezekutivu.
 
 Diretór ne’e mós informa katak, Website ba munisípiu iha prosesu dezenvolve no hein katak iha tinan oin sei utiliza website rasik la’ós de’it website maibé aplikasaun lubuk ida bele hahú ona.
 
Ho nune’e, Xefe Departamentu Rekursu Umanu Munisípiu Manatuto, Rosália dos Santos hatete, durante ne’e, servisu ne’ebé liga ho liña internet, bainhira iha fallansu ruma sempre kontaktu direta ba ministériu maibé agora iha ona vokál point TIC TIMOR nian ne’ebé ajuda iha Munisípiu tanba iha fallansu ruma liga ho free balance nian sempre konsulta ho pontu vokál ne’e.
 
Alende ne’e, Sekretária Autoridade Munisípiu Baucau, Maria Celestina Viegas informa,   durante ne’e sira tenta kria email ofisial munisípiu nian maibé, liu husi prezensa TIC TIMOR nian, karik bele fasilita sira hodi kria hela tanba munisípiu mós planu hela atu  kria email  refere hodi akumula servisu munisípiu nian hodi bele hato’o ba  parte hotu-hotu atu asesu.
 
Nia mós apresia ho servisu Pontu vokál TICTIMOR I.P nian, ne’ebé iha munisípiu tanba fasilita tebes servisu tékniku nian.
 
“Liu husi aprezentasaun ne’ebé halo, bele dada koñesimentu autoridade munisípiu sira nian tanba informátika hanesan área ne’ebé espesífiku ne’ebé só ema tékniku maka bele domina”, nia afirma.
 
Iha fatin seluk, Diretór Aprovizionamentu Munisípiu Lautém, Martinho Estevez haktuir katak, Pasu primeiru maka hanesan iha ona apoiu IT ida iha ne’e no orsamentu tinan 2019 tenta atu rekruta asesór IT maibé ikus mai la konsege halo tanba hanoin bainhira rekruta asesór maibé tékniku laiha entaun la konsege rekruta no hetan oportunidade di’ak husi Gabinete Primeiru Ministru (GPM) liu husi TIC TIMOR bele koloka ida iha ne’e. Sei prepara buat balun ne’ebé necesita atu kria sistema balun ne’ebé presiza.
 
 Ba futuru iha planu, atu tuir treinamentu kona-ba komputadór iha parte nivel suku to’o postu administrativu, tanba agora dadauk menus koñesimentu iha área ida ne’e.
 
Ho ida ne’e, Diretór Aprovizionamentu Munisípiu Viqueque, Paulino Pinto hatete, ho prezensa Ajente TIC TIMOR nian bele fasilita sira nia servisu liu-liu iha área tékniku.
 
Nia mós informa katak, durante ne’e liña la’o di’ak maibé dala ruma liña falla tanba Kapasidade internet kiik tanba ne’e nia husu atu aumenta kapasidade liña internet hodi fasilita sira nia servisu. #Média TIC#