EKIPA AJÉNSIA TIC TIMOR I.P. HALA’O WORKSHOP NO LANSAMENTU WEBSITE IHA ÁMBITU SERIMÓNIA GRADUASAUN IPB BA DARUAK

Diretór Dezenvolvimentu Sistema no Aplikasaun (DSA), Tékniku Ajénsia Teknolojia Informasaun no Komunikasaun (TIC) TIMOR I.P., Justo Fernandes akompaña husi Diretór Infraestrutura, Andre Felix Marques hamutuk ho ekipa hala’o Workshop no Lansamentu Website IPB nian iha ámbitu serimónia Graduasaun IPB ba daruak.        

Objetivu husi workshop ne’ebé ekipa TIC TIMOR I.P. realiza hodi fornese Sistema Aplikasaun sira hodi hafásil servisu Institutu Politékniku Betanu (IPB) nian. Matéria ne’ebé ekipa tékniku TIC TIMOR diskute iha workshop refere mak hanesan, halo aprezentasaun kona-ba TIC nia papél no responsabilidade, introdusaun kona-ba DSA ninia servisu, halo mós aprezentasaun kona-ba sistema Jestaun Rekursu Umanu, vi-call hodi fasilita vídeo konferénsia, Cloud nu’udar sistema kompartillamentu fixeiru no informasaun, jestaun korrespondénsia hodi rejista karta sira, no sistema seluk tan hanesan, biblioteka eletrónika, no e-learning.

Iha biban ida ne’e Diretór infraestrutura, Andre Felix Marques, halo mós aprezentasaun kona-ba Divizaun Infraestrutura nia misaun, Papél no servisu ne’ebé Infraestrutura hala’o to’o ohin loron.

Durante treinamentu nia laran Prezidente IPB, Sr. Acacio Cardoso Amaral, hateten, Institutu Politékniku Betanu (IPB) sei nafatin husu ba TIC hodi apoiu iha área informátika nian.

“IPB sei presiza nafatin TIC TIMOR nune’e, espera katak TIC sei la rende hodi atende ami nia pedidu”, husu Prezidente IPB ne’e ba TIC.

Workshop ne’ebé tékniku TIC TIMOR I.P. fornese ba IPB hanesan atividade ne’ebé Divizaun Dezenvolvimentu Sistema Aplikasaun (DSA) nian, hala’o hodi fahe koñesimentu ba IPB kona-bá TIC TIMOR ninia ezisténsia no papél iha kontestu Governu Eletróniku no iha área teknolojia informasaun no komunikasaun. Alende ida ne’e, hanesan mós kontinuasaun husi kooperasaun ne’ebé maka TIC no IPB asina tiha ona iha 12 Maiu 2021 liuhosi asinatura MoU no SLA.

Treinamentu refere hala’o durante loron rua no remata ho fahe sertifikadu ba IT IPB nian, iha mós serimónia ba graduasaun daruak IPB nian ne’ebé maka taka ho lansamentu website IPB ne’ebé kria husi tékniku Ajénsia TIC TIMOR I.P. #Média#TIC.