EKIPA BCTL HALA’O ENKONTRU HO TIC TIMOR NO PCM KONA-BA PROGRESU UNIQUE ID

Vise Governadór Supervizaun Bankária Banco Central Timor-Leste (BCTL), Nur Aini Djafar Alkatiri, ho nia ekipa hala’o enkontru ho Vise Diretór Ezekutivu Ajénsia Tecnologia da Informação e Comunicação (TIC) TIMOR I.P, Justo Fernandes hamutuk ho ekipa husi Presidência do Conselho de Ministros (PCM) nomós Jestora Sekretariadu Unique ID, Elizabeth Baptista hodi hatene kle’an kona-ba progresu husi projetu refere hodi haree karik UID ne’e rasik bele rezolve problema ne’ebé BCTL hasoru.
 
Iha enkontru ne’e, Vise Governadór Supervizaun Bankária ne’e hatete, BCTL iha sistema ida ne’eb’e naran Credit Registry Information System (CRIS) ne’ebé lansa iha 2009. CRIS rezista sidadaun sira ne’ebé hakarak foti kréditu iha BCTL. Rekerementu ne’ebé uza agora dadaun maka Kartaun Eleitoral. Dalaruma ema ida iha eleitoral rua, tanba ne’e susar atu identifika ema ida ho loloos.
 
Tanba , BCTL presiza sentraliza sistema banku nian nomós liga sistema CRIS ho sistema iha banku sira seluk atu verifika karik ema ne’e iha ona kréditu iha banku seluk ka lae.
 
Ho nune’e Vise Diretór Ezekutivu TIC TIMOR I.P, halo introdusau kona-ba ekipa UID nian husi PCM no TIC TIMOR ho ida-idak nia papél no responsabilidade nomós agradese ba visita husi BCTL.
 
Iha biban ne’e,  Asesór Reforma Administrativa PCM, Fausto Gama hatete, Inisiativa Unique ID iha tanba Timor-Leste enfrenta problema oioin, ho  ida ne’e Governu deside hodi buka solusaun atu diminui problema sira ne’e. Problema boot ida maka, dadus barak la authentic no iha duplikasaun barak tanba ne’e susar atu identifika sidadaun sira hodi simu benefísiu husi Governu. Programa Unique ID mós nu’udar parte ida husi programa reforma administrative 2019 to’o 2023 ne’ebé sai mós programa prinsipál VIII Governu nian.
 
Alende ne’e, Jestora Sekretariadu  Unique ID, Elizabeth Baptista informa, progresu servisu ne’ebé agora dadauk ekipa Komisaun Téknika Eventual  (KTE), hala’o hela hanesan, Draft planu estrateziku ne’ebé ekipa KTE prepara iha ona prosesu revisaun husi espesialista (expert) husi parseiru dezenvolvimentu sira. Bainhira revizaunn ramata, sei halo konsultasuan internal (instituisaun governu nian) no esternal setór privadu, sosiedade civl no parseiru dezenvolvimentu sira no sei lori ba Konsellu Ministru atu aprova.
 
Entretantu, ekipa KTE ne’ebé prepara Planu Estratéjia Integradu no ba implementasaun sistema Identifikador Úniku hamutuk ho planu operasional no orsamentu maka,   kompostu husi ministériu 8 (PCM, MJ, MF, MS, MAE, MEJD, MSSI, MI), hamutuk ho Funsaun Públika no TIC TIMOR. Ekipa KTE ne’e rasik lidera husi Diretór Ezekutivu TIC TIMOR I.P, Roberto Caitano de Sousa Vicente. #MÉDIA TIC#