EKIPA KTE HALA’O ENKONTRU DAHULUK HO KOMISAUN INTERMINISTERIÁL HODI RELATA KONA-BA PROGRESU SERVISU KTE NIAN

Ekipa Komisaun Téknika Eventual (KTE) ne’ebé lidera husi Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, hala’o enkontru dahuluk ho Komisaun Interministeriál Unique ID nian hodi relata kona-ba progresu servisu KTE nian.
 
Membru Komisaun Interministeriál Unique ID nian kompostu husi Membru Governu sira husi Ministériu Reforma Legislativa Asunto Parlamentar (MRLAP) ne’ebé agora muda fali ba Presidência do Concelho de Ministros (PCM), Ministériu Justisa (MJ), Ministériu Finansas (MF), Ministériu Solidariedade Sosiál no Inkluzaun (MSSI), Ministériu Edukasaun Juventude no Desportu (MEJD), Ministériu Saúde (MS), Ministériu Administrasaun Estatál (MAE), Ministériu Interior (MI) no Komisaun Funsaun Publika (KFP).
 
KTE ne’e rasik estabelese liu husi Rezolusaun Governu númeru 19/2020 iha fulan Marsu ho nia papél tuir rezolusaun  katak, iha fulan neen (6) nia laran tenke prodúz dokumentu estratéjia integradu ida kona-ba implementasaun sistema Identifikadór Úniku iha Timor-Leste inklui mós ba nia planu operasionál no orsamentu. Membru husi KTE nian mai husi instituisaun sanulumaka hanesan:  PCM, MJ, MF, MSSI, MEJD, MS, MAE, MI, KFP no TIC TIMOR rasik.
 
Unique ID nudar parte identidade dijital ne’ebé sei atribui ba ema ida husi moris to’o mate. Unique ID sei beneficia parte tolu (3): Sidadaun, Governu no setor privadu. Ho identidade dijital, sidadaun sira bele asesu fasilidade sira ho diak no lais liu tan. Ba perspetiva Governu ninian, Unique ID bele tulun hodi salva osan no tempu. Governu bele hamenus kazu sira hanesan fraude identidade,  ezemplu, iha pagamentu ba kontratu, sálariu, pensaun no subsídiu sosiál sira. Governu mós bele iha visaun jerál kona-ba identidade sidadaun sira nian. Unique ID sei tulun mós instituisaun Governu nian atu liga baze de daduz funsional sira hodi bele fahe dadus ba malu. Ikus liu, identidade dijital kria fundasaun ka baze ba E-government iha Timor-Leste nia laran.
 
Enkontru ne’e rasik, prezide husi Ministroda Presidência do Conselho de Ministros, Fidelis Manuel Leite Magalhães, iha mós aprezentasaun husi Diretór Ezekutivu TIC TIMOR I.P Roberto Caitano de Sousa Vicente no Diretór Nasional Rejistu Notariadu – Ministériu Justisa, João Fernandes Borges kona-ba progresu ne’ebé Komisaun Téknika Eventual alkansa ona no aprezentasaun husi Jestora ba programa Identifikador Úniku, Elizabeth Baptista kona-ba ezbosu planu estratéjiku integradu ba materializasaun sistema Identifikador Úniku.
 
Entretantu partisipa iha enkontru ne’e, maka Ministru Finansas, Fernando Hanjam, Ministru Justisa, Manuel Cárceres da Costa, Vise Ministru Edukasaun Juventude no Desportu, António Guterres, Vise Ministra Solidariedade Sosiál no Inkluzaun, Signi Chandrawati Verdial, Vise Ministru Interior, António Armindo, Diretór Jerál STAE, Alcino Manuel Branco, Diretór Jerál Servisu Korporativu, Vitor Soares Martins, Diretór Ezekutivu da TIC TIMOR I.P, Roberto Caetano De Sousa Vicente, Diretór Nasional Rejistu Notariadu (DNRN), João Fernandes Borges nomós  Membru Komisaun Tékniku Eventual (KTE). Enkontru ne’e hala’o iha salaun TradeInvest, Colmera Dili. #MÉDIA TIC#