EKIPA PANELISTA TIC TIMOR I.P FÓ TESTE LIVE CODING BA KANDIDATU SOFTWARE DEVELOPER

Ekipa panelista husi Ajénsia Tecnologia da Informação e Comunicação  ( TIC) TIMOR I.P fó teste live coding ba kandidatu officias software Developer na’in 5 ne’ebé liu ona iha selesaun dokumentu no entrevista .

Iha abertura ba teste ne’e, Diretór Ezekutivu TIC TIMOR I.P, Roberto Caitano de Sousa Vicente ne’ebé sai hanesan observadór iha teste refere hatete, teste ida ne’e nia Objetivu prinsipal maka atu prova kandidatu sira nia koñesimentu iha língua programasaun oin-oin hodi rezolve no fó solusaun ba problema ne’ebé  panelista deseña bazeia ba situasaun real.

 

Teste halo programasaun live ne’e, atu hatudu koñesimentu programasaun nian liga ba área ne’ebé Ajénsia presiza.

 

 Diretor ne’e mós salienta tan katak, rezultadu husi teste ida ne’e la’ós final tanba sei kombina mós valor husi área seluk hanesan resultadu teste oral no eskrita, personalidade ka atitude pesoal bainhira servisu iha ekipa, simu ema nia opiniaun no umilde. Valor hirak ne’e maka tau hamutuk hodi deside programador sira ne’e susesu atu servisu iha Ajénsia ne’e.

 

Xefe Ezekutivu ne’e mós hatete, área informátika kuaze área ne’ebé domina husi mane tanba ne’e, Ajénsia TIC TIMOR determinadu atu promove igualdade jéneru no fó espasu tomak ba maluk feto inklui maluk Timor oan ho kondisaun defisiente atu hatudu sira nia abilidade iha área ida ne’e ho objetivu hamutuk dezenvolve aplikasaun ba nesesidade Estadu no Guvernu nian.

 

To’o agora, TIC TIMOR I.P nia funsionáriu haree husi balansu jéneru atinji ona 45% feto ne’ebé maka barak liu servisu iha área tékniku hanesan iha área infraestrutura rede Governu eletróniku nian no seluk iha área aplikasaun hodi dezenvolve aplikasaun ba instituisaun Governu sira inklui feto nain 5 husi total ema nain 12 ne’ebé servisu hanesan fokal point TIC nia iha munisípiu 12. 

Entretantu kandidatu ba teste live coding ne’e hamutuk nain 5, no audiencia husi Junior Profesional (JP) nain 6 (Feto 2 no Mane 4) ne'ebe shortlisted ona husi teste oral no eskrita, maibe la significa katak kandidatu JP nain 6 ne'e passa ona iha prosesu rekrutamentu. #Média TIC#