EKIPA TÉKNIKU AJÉNSIA TIC TIMOR FASILITA TREINAMENTU SISTEMA OFÍSIU BA FUNSIONÁRIU ANAS I.P.

Ekipa Tékniku Ajénsia Teknolojia Informasaun no Komunikasaun Sigla português (TIC) TIMOR I.P., liu hosi Diresaun Dezenvolvimentu Sistema Aplikasaun (DSA) fasilita treinamentu Sistema Ofísiu ba funsionáriu sira hosi Autoridade Nacional Agua e Saneamento (ANAS) I.P., iha edifísiu ANAS I.P., Kaikoli.

Objetivu hosi treinamentu ne’e, atu fasilita funsionáriu sira hosi ANAS I.P., hodi dijitaliza karta-tama no karta-sai inklui arkiva karta sira atu nune’e, diretiva hosi ANAS I.P. bele hatene paradeiru karta ruma.

Abertura ba treinamentu ne’e, Diretora Interina Diresaun Dezenvolvimentu Sistema Aplikasaun Sra. Maria da Frosa H. Marques hatete, mundu global ohin loron iha mudansa boot no inovasaun iha área Teknolojia Informasaun no Komunikasaun mudansa ida ne’e afeta iha moris loroloron iha sosiedade nomós direta ba servisu rasik.  Ho mudansa sira ne’e, obriga Governu atu kria kondisaun ne’ebé di’ak ba sidadaun sira atu bele asesu ba teknolojia dijitál ne’ebé pozitivu no bele hetan informasaun ne’ebé kredivel, lalais, efikasia hodi apoiu dezenvolvimentu iha área ekonomia, sosiál inklui igualdade jéneriu.

TIC TIMOR hanesan instituisaun públiku ne’ebé harii iha VI Governu Konstitusionál bazeia ba dekretu lei númeru 29/2017 ne’ebé tutela ba Primeiru-Ministru. Ajénsia ida ne’e harii atu oinsá dezenvolve liu tan setór Teknolojia Informasaun no Komunikasaun hodi bele hafasil servisu ne’ebé ho kualidade di’ak iha Governu no ba sidadaun sira hotu.

Papél importante hosi TIC TIMOR I.P. maka oinsá atu implementa estratéjia ne’ebé iha tanba ne’e, Governu mai ho polítika ida atu hadi’a liu tan administrasaun públika menus birokrasia liu hosi mekanizmu ida atu garantia efisiénsia, efikásia, transparénsia no bele halo servisu ne’ebé di’ak liu.

Diretora Interina informa, to’o ohin loron TIC TIMOR fornese ona servisu ICT ba instituisaun Governu hamutuk 55 liu hosi DSA dezenvolve ona web portal, web application hamutuk 57 hosting web portal no web application hamutuk 78 ba instituisaun estadu 34 no mellora mós migrasaun sistema sira, kolabora ho parseiru sira. Ida ne’e, hanesan polítika Governu Eletróniku  asegura dadus Governu nian hodi halo servisu kolaborasaun entre Governu ho Governu, Governu ho sidadaun, Governu ho setór privadu  no Governu ho parseiru dezenvolvimentu nasionál no internasionál.

Tanba objetivu sira ne’e maka TIC TIMOR fornese tan Sistema Eletrónika ida ba ANAS I.P., ne’ebé hanaran Sistema Ofísiu ne’ebé sei moderniza sistema ida ne’e ba servisu operasionál nian liu-liu ba karta tama no karta sai.

TIC TIMOR mai ho esperiénsia ne’ebé boot tebes liu hosi kolaborasaun ida ne’e, sei halo servisu ne’ebé di’ak liu tan, sei kontribui ba poupansa orsamentu, servisu ne’ebé transparénsia efisiente no efikasia. TIC TIMOR sei kontinua nafatin suporta ANAS I.P., bainhira presiza hosi TIC TIMOR.

Iha fatin hanesan Prezidente no Diretór Ezekutivu ANAS I.P., Sr. Domingos Pinto hatete treinamentu ida ne’e, atu hasa’e kualidade servisu Governu nian liu-liu ko’alia kona-ba efisiénsia no efikásia tanba ne’e maka realiza treinamentu ida ne’e.

ANAS I.P. nafatin fó apresiasaun boot ba TIC TIMOR ne’ebé to’o ohin loron nafatin fó apoiu ba ANAS I.P. hodi kapasita funsionáriu sira.

Alende ne’e, Sr. Tiago Fernandes mós halo aprezentasaun kona-ba lala’ok hosi sistema ne’e rasik.

Hafoin remata treinamentu, TIC TIMOR mós atribui sertifikadu apresiasaun ba partisipante sira ne’ebé partisipa ona treinamentu.    #MÉDIA#TIC