EKIPA TÉKNIKU TIC TIMOR I.P KONTINUA HALO KONEKSAUN REDE INTERNET BA FUNSIONÁRIU AUTORIDADE MUNISÍPIU BOBONARO

Ekipa Tékniku Ajénsia Teconologia da Informação e Comunicação (TIC) TIMOR I.P kontinua halo koneksaun rede internet ba  funsionáriu Autoridade Munisípiu Bobonaro hodi  fasilita funsionáriu sira asesu ba sistema  Freebalance no Dalan ba Futuru  (DBFT).
Iha biban ne'e mós, Tékniku sira kontinua halo konfigurasaun ba Voice Over Internet Protocol  (VOIP) ne'ebé antes ne'e Primeiru Ministru inagura tiha ona iha fulan Abril liu ba no halo mós performa ba liña Fibra Ótika Terrestre (FOT)  iha Munisípiu ba iha Central Palácio Governo.
Sekretáriu Munisipál Bobonaro, Julio Carvalho Caerro hateten, hafoin hetan koneksaun rede Fibra Ótika Terrestre bele fasilita sira nia servisu tanba sistema Freebalance no Dalan ba Futuru hahú la'o di'ak ona.
Sira mós husu ba TIC TIMOR I.P, atu kria email official atu nune'e hamenus kustu ba kartás no tinta atu halo imprime tanba dala barak sira hasai orsamentu lubuk ida ba kartás no tinta imprime. Ho ida ne'e sira husu atu kria outlook ba sira.
Sekretáriu ne'e  mós, sujere ba governu liu husi TIC TIMOR I.P  atu fasilita formasaun tékniku ba  tékniku sira, nune'e bele halo atendementu ba fallansu ruma iha Autoridade Munisípiu relasiona ho rede internet tanba durante ne'e  sira laiha tékniku atu halo atendementu.
Ho nune'e, Tékniku TIC TIMOR I.P Francisco Ximenes hateten, Ajénsia halo ona rekrutamentu ba Tékniku atu destaka iha Munisípiu 12 no Tékniku hirak ne'e sei hala'o nia servisu iha fulan Agostu nia laran. #Média TIC#