EKIPA TIC TIMOR HALA’O ENKONTRU HO EKIPA HUSI INCT HODI FAHE INFORMASAUN IHA ÁREA TEKNOLOJIA

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho nia ekipa, hala’o enkontru ho Prezidente Institutu Nasionál Siénsia no Teknolojia Sigla Português (INCT), José Cornelio Guterres ho nia ekipa hodi fahe informasaun kona-ba papél ne’ebé atribui hela ba Ajénsia iha área informátika.

 

Tanba VIII Governu konstitusionál tau prioridade importante ba asuntu refere no TIC TIMOR hola parte mós iha prioridade ne’e tanba papél TIC TIMOR nian atu fasilita koordenasaun entre liña ministeriál sira liu husi aplikasaun informátika nune’e Ajénsia haree oinsá ba oin servisu di’ak liu tan ho instituisaun estadu sira atu fó apoiu nomós hanoin ida atu sentraliza sistema rekursu informátika iha espasu ne’ebé maka Governu kria ona iha TIC TIMOR.

 

Xefe Ezekutivu informa, problema ne’ebé tinan-tinan hasoru maka problema asegura memória institusionál katak, kada tinan Governu troka no memória instituisaun labele asegura tanba la sentraliza sistema rekursu informátika.

 

Iha biban ne’e Diretór Infraestrutura TIC TIMOR I.P, André Felix Marques halo mós aprezentasaun kona-ba ezisténsia Ajénsia nian, servisu ne’ebé atinje ona inklui planu ne’ebé sei halo iha futuru.

 

Ho nune’e, Presidente INCT hatete, agora dadauk prepara atu tama iha Governu Eletróniku tanba ne’e ho prezensa TIC TIMOR nian bele fó apoiu ba sira nia instituisaun.

 

 INCT nia servisu mós hanesan instituisaun ne’ebé sai sentru peskiza no papél ida maka oinsá fasilita investigadór sira liu husi arkivu sira tanba ne’e, maka atu kria repojitoriu dijitál ida atu rekolla dadus liu-liu arkivu sientífika ne’ebé publika husi timor oan ka ema estranjeiru sira bele tau iha repojitoriu atu nune’e estudante sira bele asesu.

 

Alende ne’e, parte rua halo diskusaun kona-ba saida maka INCT presiza iha área informátika nomós oinsá maka TIC TIMOR bele fó apoiu ba área refere. #MÉDIA TIC#