EKIPA TIC TIMOR HALA'O ENKONTRU HO SEMA HODI FAHE INFORMASAUN LIGA BA SERVISU TIC TIMOR NIAN IHA ÁREA INFORMÁTIKA

Diretór Ezekutivu Ajénsia Tecnologia da Infomação e Comunicação (TIC) TIMOR I.P Roberto Caitano de Sousa Vicente ho nia ekipa hala’o enkontru ho Sekretáriu Estadu Meiu Ambiente (SEMA) Demétrio do Amaral de Carvalho ho ekipa hodi ko’alia kona-ba oinsá TIC TIMOR I.P fó apoiu di’ak liu tan ba SEMA liu husi  área informátika.
 
Ho ida ne’e, Sekretáriu Estadu AmbienteDemétrio  do Amaral de Carvalho, husu karik iha  posibilidade TIC TIMOR bele  apoia SEMA hodi kria koneksaun rede Fibra Ótika (FO) ba data center TIC TIMOR nian  hodi asesu  ba sistema Freebalance.
 
Nune’e, Diretór Ezekutivu TIC TIMOR I.P informa, Ajénsia nia papél atu implementa polítika liga ba ICT hodi prepara teknolojia ne’ebé di’ak liu hanesan aplikasaun, infraestrutura nomós rede Fibra Ótika (FO) bazeia ba prioridade nasionál.
 
Ajénsia ne’e, nu’udar   área ne’ebé ho dekretu lei atu haree lala’ok iha instituisaun Governu tomak tanba, kada tinan gasta osan barak ba dezenvolvimentu aplikasaun no hola ekipamentu sira tanba ne’e, TIC TIMOR tenta atu sentraliza rekursu sira ne’e iha fatin ida.
 
Bazeia ba pedidu ne'ebe SEMA fo, ekipa tékniku TIC TIMOR sei halo Assessment ba rack server SEMA nian hafoin mosu ho proposta ne’ebé ho kedas ninia baze ne’ebé iha.
 
Alende ne’e, Diretór Infraestrutura TIC TIMOR André Felix Marques, halo mós aprezentasaun kona-ba servisu ne’ebé TIC TIMOR I.P atinje ona, prosesu servisu ne’ebé la’o hela no planu ne’ebé sei implementa iha futuru.
 
 Entretantu enkontru ne’e hala’o iha edifísiu SEMA. #MÉDIA TIC#