EKIPA TIC TIMOR I.P HALA’O ENKONTRU HO EKIPA HUSI MINISTÉRIU DEFEZA

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa, hala’o enkontru ho Diretór Jerál Administrasaun Ministériu Defeza Nuno Carvalho dos Santos ho nia ekipa hodi ko’alia kona-ba oinsá, TIC TIMOR I.P fó apoiu iha área teknolojia.

Tanba tuir dekretu lei númeru 29/2017, TIC TIMOR I.P, iha nia papél atu fó tulun ba liña ministerial sira inklui Ministériu Defeza hodi prepara teknolojia ne’ebé ótimu inklui aplikasaun, infraestrutura nomós rede Fibra Ótika (FO) bazeia ba prioridade nasionál.

Iha biban ne’e, Diretór Aplikasaun TIC TIMOR I.P Justo Fernandes, halo mós aprezentasaun ho nia objetivu, atu fahe informasaun ne’ebé kle’an kona-ba ezisténsia Ajénsia nian, servisu ne’ebé TIC TIMOR atinje ona nomós planu servisu ne’ebé sei implementa iha futuru atu nune’e Ministériu Defeza bele apar ho TIC TIMOR tuir nesesidade ne’ebé Ministériu presiza nune’e bele tau iha planu ba tinan oin.

Ho nune’e parte Ministériu Defeza apresia ho TIC TIMOR  ne’ebé sai hanesan Ajénsia Governu nian ne’ebé tenke kolabora ho instituisaun hotu-hotu nune’e bele dezenvolve sistema komunikasaun ida ne’ebé di’ak.

Iha enkontru ne’e diskute mós kona-ba sistema komandu kontrolu no oinsá kapasita rekursu umanu iha área IT nomós iha área sira seluk ne’ebé maka importante inklui kona-ba koneksaun liña intranet atu nune’e bele asesu ba sistema freebalance no Dalan ba Futuru.

Entretantu enkontru refere, hala'o iha  Edifisiu Ministeriu Defeza (MD) Fatuhada Dili. #MÉDIA TIC#