EKIPA TIC TIMOR I.P HALA’O ENKONTRU TÉKNIKU HO EKIPA MINISTÉRIU AGRIKULTURA NO PESKA

Diretór Aplikasaun Ajénsia Tecnologia da Informação e Comunicação (TIC) TIMOR I.P, Justo Fernandes akompaña husi Diretór Infraestrutura, André Felix Marques ho nia ekipa, hala’o enkontru tékniku ho ekipa husi Ministériu Agrikultura no Peska (MAP), liu husi Diresaun Polítika no Planeamentu nomós Diresaun Nasional Peskiza.

Objetivu husi enkontru ne’e, atu halo assessment ba rede sira ne’ebé agora dadauk iha MAP, tanba tuir planu Ajénsia nian sei iha ligasaun direta husi MAP ba Palásiu Governu.

 Iha sorumutu ne’e, Diretór Aplikasaun Justo Fernandes hatete, ida ne’e, hanesan standard operasionál husi parte infraestrutura nian atu bele halo preparasaun, nune’e rede rua ne’e bele iha ligasaun ba malu. Husi aplikasaun mós haree ona planu sira ne’e bele asesu liu husi internet no intranet.

Nia dehan, nu’udar Ajénsia Teknolojia sente kontente, tanba Ministériu iha inisiativa hakarak iha sistema ida atu koleta dadus sira, tanba iha futuru sei implementa Governu Eletróniku no tuir lei ne’ebé iha, fó responsabilidade tomak ba Ajénsia TIC TIMOR I.P, hodi implementa Governu Eletróniku.

Iha biban ne’e, Diretór Nasionál Peskiza MAP, Claudio Ninans Nabas hatete, Durante tinan barak, sira la’o ho sistema manual tanba ne’e, iha problema bainhira iha informasaun ne’ebé liga ho sistema.

Tanba ne’e maka, presiza iha sistema ida ne’ebé di’ak liu atu fasilita servisu hodi koleta dadus sira liga ho programa oioin, tanba sira hakarak sira maka sai na’in ba sistema nune’e labele dependente ba ema.

Nia dehan, sira seidauk iha sistema kontrolu hanesan, sistema ne’ebé atu estabelese ba monitorizasaun no avaliasaun.

Ho ida ne’e, sira husu oinsá bele operasionalliza sistema ida nomós servisu hamutuk ho tékniku sira ne’ebé rekolla dadus. #Média TIC#