EKIPA TIC TIMOR I.P HO SAMES HALA’O ENKONTRU HODI DISKUTI KONA-BA APOIU SERVISU IHA ÁREA TEKNOLOJIA

Diretór Administrasaun no Finansas, Serviço Autónomo de Medicamentos e Equipamentos de Saúde (SAMES), Francisco Borges, hala’o enkontru ho Diretór Aplikasaun Ajénsia Tecnologia da Informação e Comunicação (TIC) TIMOR I.P, Justo Fernandes, hodi husu Ajénsia atu fó apoiu iha área teknolojia nian hanesan, web hosting, ligasaun fibra ótika, liña internet no seluk tan, nune’e sira bele hala’o servisu ne’ebé di’ak liu tan.

Tuir Xefe Administrasaun no Finansas SAMES, ne’e katak, sira iha kapasidade liña internet ne’ebé kiik loos tanba ne’e, difikulta sira atu asesu ba servisu finansas nian, liu-liu liga ho pagamentu no aprovizionamentu nian ne’ebé liga ho CPV tanba, iha mós programa barak hanesan MSUPPLY ne’ebé sei liga ba iha Munisípiu 13 tanba ne’e, iha inisiativa atu buka alternativa saida maka bele halo.

Ho ida ne’e maka, sira husu oinsá parte TIC TIMOR I.P, bele apoiu SAMES atu bele mellora liu tan infraestrutura IT nian iha instituisaun ne’e rasik.

Sira mós prepara hela website ofisial ba SAMES nian no preparasaun kuaze finaliza ona.

Hatán ba ida ne’e, Diretór Aplikasaun TIC TIMOR I.P informa,  Kona-ba sistema MSUPPLY bele asesu liu husi intranet (ligasaun liu husi Fibra Ótika Governu nian), tanba bele liga direta husi edifísiu munisípiu nian ba iha liña Ministériu saúde Munisipál hodi  asesu.

Nia dehan, Ajénsia prontu atu simu pedidu husi instituisaun Governu sira no la’ós instituisaun Governu de’it maibé, haree hotu ba órgaun soberania sira seluk nia nesesidade.

TIC TIMOR prontu atu responde nesesidade ne’ebé SAMES presiza tuir kapasidade ne’ebé iha, tanba Timor-Leste sei presiza nesesidade importante ne’ebé barak liu ba implementasaun teknolojia.

Iha enkontru ne’e, Xefe Divizaun Aplikasaun mós introdús kona-ba ezisténsia Ajénsia ne’e nian nomós servisu ne’ebé TIC TIMOR halo ona.

Entretantu sei iha tan enkontru tékniku ho Divizaun Infraestrutura hodi fahe informasaun téknikamente. #Média TIC#