EKIPA TIC TIMOR KONTINUA APREZENTA PLANU INSTALASAUN VIDEO CONFERENCING IHA TR

Diretór Infraestrutura Ajénsia Tecnologia da Informação e Comunicação (TIC) TIMOR I.P, André Felix Marques, kontinua esplika planu instalasaun aplikasaun Video Conference ba  ekipa husi Tribunal Rekursu (TR).
 
Iha enkontru ne’e Diretór Infraestrutura hatete, aplikasaun ne’e hanesan meius ida atu bele fasilita enkontru entre Prezidente Tribunal Rekursu ho Juis Administradór Distritál, membru konsellu sira nomós funsionáriu sira iha Tribunal Rekursu.
 
Nia esplika, sistema Video Conference nia modelu fasil no presiza mós instala iha komputadór sira no bele asesu mós husi telemovel.
 
 Diretór ne’e afirma katak, atu Jere sesaun ne’e, presiza ema ne’ebé hetan konfiansa husi Prezidente Tribunal Rekursu.
 
Sei iha mós sesaun treinamentu no iha mós manual nune’e iha dúvida ruma, ekipa Tékniku TIC TIMOR sei fó orientasaun.
 
TIC TIMOR mós hato’o ona karta ba órgaun soberania haat no ba liña ministériu sira atu bele instala aplikasaun ne’e.
 
Nia akresenta tan katak, Ajénsia TIC TIMOR mós uza ona aplikasaun refere ba enkontru durante iha situasaun Estadu Emerjénsia. Kada sesaun enkontru bele to’o ema na’in 200.
 
Iha biban ne’e, Diretór Administrasaun Finansas no Protokolu Tribunal Rekursu, Francelino Martins hatete, aplikasaun ne’e kapás tebes tanba ho situasaun ne’ebé agora dadauk enfrenta ne’e Prezidente Tribunal bele halo servisu husi uma no iha fatin ne’ebé de’it no bele halo servisu ho Juis Administradór Distritál nomós ho nia membru konsellu sira.
 
Ida ne’e fó vantajen boot ba Tribunal Rekursu la’ós atu uza ba tempu agora ne’e de’it maibé bele uza ba iha futuru.
 
Tanba ne’e nia parte sei hato’o ba PTR atu bele nomea ema ruma ne’ebé hetan konfiansa hodi Jere aplikasaun ne’e.   #Média TIC#