EKIPA TIMOR TELEKOM HALA’O ENKONTRU INFORMATIVU HO DIRETÓR EZEKUTIVU TIC TIMOR I.P

Ekipa Tékniku Timor Telekom (TT) hasoru malu ho Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente, hodi informa kona-ba fiu Fibra Ótika ne’ebé hetan estraga tanba impaktu husi manutensaun fiu eletrisidade ne’ebé hala’o husi kontrator ne’ebé kontrata husi Eletrisidade de Timor-Leste(EDTL).
 
Iha enkontru ne’e, Xefe Informasaun Timor Telekom (TT) Ladislau Saldanha informa katak, iha difikuldade ituan ba sira tanba servisu EDTL nian, bainhira halo intervensaun ruma liña Fibra Ótika sempre kona.
 
Nia dehan, kajú ne’e la’ós foin akontese agora tanba ne’e, bainhira projetu hotu maka laiha liña koordenasaun ne’ebé di’ak, bele impede TIC TIMOR I.P nia servisu ba oin tanba ne’e, nia parte sujere atu kria liña koordenasaun ne’ebé di’ak ho EDTL nune’e bele halo prevensaun ba kestaun ida ne’e iha futuru.
 
Ladislau mós informa, Back up link iha Camea seidauk monta tanba EDTL sei halo sira nia servisu kada fin da semana. Sira troka poste tuan ba poste foun. Servisu ida ne’e sira halo hela de’it .
Ho nune’e Diretór Ezekutivu hateten, nia anota saida maka Timor Telekom hato’o no nia parte marka ona audiénsia ho parte Ministériu Obras Públika (MOP), atu halo enkontru koordenasaun entre TIC TIMOR I.P, Timor Telekom no MOP, katak asidente ne’e sempre akontese no husu sira nia atensaun.
 
Roberto Caitano mós hateten, bainhira iha ona aseitasaun husi MOP, Ajénsia TIC TIMOR sei haruka karta ba TT hodi forma ekipa konjuntu entre instituisaun tolu ne’e ba sérvisu manutensaun ne’ebé sira halo iha kada estasaun ne’ebé infraestrutura eziste ba. # Media TIC#