ERMERA APRESIA SERVISU TIC TIMOR NIAN LIU HUSI KONEKSAUN REDE INTERNET

Bazeia ba ekipamentu  Ajénsia Tecnologia da Informação e Comunicação TIC TIMOR I.P nian,  liu-liu  koneksaun rede Fibra Ótika Terrestre (FOT)  ba Munisípiu sira, Sekretáriu Autoridade Munisípiu Ermera Dalino Babo, apresia tebes tanba, koneksaun rede internet la’o di’ak hodi bele asesu ba sistema Freebalance, Dalan Ba Futuru (DBFT) ho velosidade  internet ne’ebé lais.

Nia mós haktuir katak, Tékniku ne’ebé TIC TIMOR oferese bele apoiu servisu tékniku nian iha Munisípiu.

Nia dehan, antes ne’e koneksaun susar tebes maibé hafoin liña FOT ne’ebé TIC TIMOR oferese seidauk mosu problema ruma kona-ba liña internet.

Iha fatin hanesan Diretór Administrasaun no Finansas Munisípiu Ermera, Francisco de Deus hatete, liña internet durante ne’e la’o di’ak.

 “Tékniku ne’ebé ajuda kuaze fulan ida, servisu la’o di’ak tanba uluk tékniku ne’e seidauk mai dala ruma internet falla ne’e susar ituan atu rezolve maibé hafoin iha tiha tékniku sente servisu la’o di’ak. Dala ruma ahi mate maka  problema ituan iha koneksaun”, nia informa.

Alende ne’e, Diretór Planeamentu Munisípiu Ermera Constantino Exposto informa katak, nia parte agradese tanba iha ona tékniku ne’ebé bele atende servisu iha área teknolojia tanba durante ne’e sira laiha tékniku hodi haree problema.

Nia dehan, rede FOT nia koneksaun la’o di’ak tebes tanba durante ne’e Sistema freebalance asesu di’ak.

Nia mós informa katak, antes ne’e bainhira atu asesu ba Sistema freebalance, tenke taka liña internet iha komputadór seluk maibé hafoin liña TIC nian tama, problema ne’e la mosu ona.

Diretór ne’e mós husu, kona-ba pagamentu ba liña internet ne’e iha futuru Munisípiu sira maka atu halo ka husi nasionál tanba sira presiza atu tau iha planu orsamentu.

Ho nune’e Diretór Infraestrutura TIC TIMOR, André Felix Marques hatete, kona-ba pagamentu, agora dadauk saida maka TIC TIMOR oferese ba Munisípiu gratuita tanba mai husi OJE tanba planu Ajénsia  nian atu redús kustu ba liña internet.

Tanba iha Dili, Ministériu idak-idak iha nia fornesedor internet husi fatin ketak-ketak ho nune’e, oinsá atu sentraliza saida maka Governu nian hodi bele redús kustu no karik tinan 5 ka 10 mai sei aplika kustu ba edifísiu ne’ebé utiliza internet maibé nia kustu sei baratu liu kompara ho operadór sira oferese. Pagamentu ne’e mós sei halo ba manutensaun de’it signifika katak no sei baratu liu.

Diretór ne’e mós informa katak, TIC nia liña fahe ona ba utilizadór normal, VIP, nomos  ezekutivu.

Ba sira ne’ebé kaer Sistema tama hotu iha VIP, tanba ne’e buat tolu ne’e la’o paralelu maibé la’o ketak-ketak.

Entretantu ekipa tékniku mós halo koneksaun ba printer online sira ne’ebé iha Munisípiu sira hodi fasilita funsionáriu sira hodi imprime dokumentu. #Média TIC#