FUNSIONÁRIU AJÉNSIA TIC TIMOR I.P., HALA’O RETIRU ANUÁL HO TEMA “MAD: REFLECTING THE PAST AS A STEPPING STONE TO ACHIEVE FUTURE GOALS”

Diretór Ezekutivu Ajénsia Teknolojia Informasaun no Komunikasaun, sigla português (TIC) TIMOR I.P., Roberto Caitano de Sousa Vicente ho nia estrutura tomak hamutuk ho funsionáriu sira, hala’o retiru anuál ho tema jerál “Making A Diference: reflecting the past as a stepping stone to achieve future goals” ho objetivu atu reflete oinsá maka bele ultrapasa problema sira ne’ebé hasoru iha tinan ida nia laran hodi atinje objetivu Ajénsia nian liuhosi servisu sira ne’ebé maka atinje ona, sei iha prosesu nia laran no fallansu ne’ebé hasoru iha tinan ida nia laran.

Iha retiru ne'e taka ho misa agradesimentu hodi remata tinan ida ne’e. Iha omilia Padre Nelson Fátima Gonçalves Salvador Soares SDB iha nia omilia hatete, instituisaun ida atu sai di’ak, hotu-hotu tenke servisu makas, hodi hola parte iha servisu ki’ik maibé tenke  servisu ho di’ak tanba ema ida-idak nia knar iha nia aan rasik.

Padre selebrante ne’e esplika, ema idak-idak iha nia planu moris hanoin ne’ebé aas maibé ema idak-idak nia moris la realiza tuir nia planu maibé tuir Maromak nia planu.

Tanba ne’e, husu nafatin ba Na’i Maromak ba saúde di’ak nafatin atu bele hala’o servisu loro-loron nian, tenke muda komunikasaun sira no hatudu nafatin espíritu matenek hodi kontinua hala’o servisu no kontinua nafatin hakbesik aan ba Maromak hodi hetan salvasaun moris nian.

Alende ne’e, Padre Jolino Viera SDB iha reflesaun esplika katak, liuhosi asaun karidade no solidariedade maka dalan ne’ebe  pesoal no iha instituisaun presiza nu’udar dalan ida atu hetan salvasaun.  Moris iha instituisaun ida tenke iha preokupasaun ba malu liuhosi ajuda malu nune’e bele hetan salvasaun iha instituisaun nia laran liuhosi servisu loroloron.

Iha fatin hanesan, Diretór Ezekutivu TIC TIMOR I.P., Roberto Caitano de Sousa Vicente hatete, retiru ne’e atu hadook aan hosi servisu, hodi halo ezame ba idak-idak nia aan tanba dala barak selebra susesu ne’ebé maka atinje no tenta atu aprende hosi fallansu ne’ebé iha. Tanba ne’e, maka pontu importante atu foti hodi halo reflesaun ba idak-idak nia aan ho kontribuisaun ne’ebé maka halo ona to’o iha ne’ebe maka ita hotu-hotu haree.

Nia informa, Ajénsia ne’ebé hahú ho ema ituan  maibé agora atinje kuaze 70 resin ona iha tinan 3 nia laran liuhosi difikuldade oioin, liu-liu iha tinan rua nia laran avansa ho orsamentu duodecimal maibé iha perspetiva ida ne’e katak,  ho motivasaun ne’ebé maka iha, maske susar ituan maibé Ajénsia foun ne’e orgullu tanba iha mudansa ne’ebe signifikante tebes, tanne’e bainhira halo reflesaun haree ba pasadu hodi haraik aan hodi nune’e halo reflesaun ne’ebé maka di’ak duni ba idak-idak nia aan mudansa ne’ebe iha.  

Ho ida ne’e, maka bele hetan kontribuisaun ne’ebé maka di’ak tanba ne’e hadi’a Ajénsia nia servisu nune’e bele tuir duni objetivu primeiru ne’ebé  Governu  fó liuhosi kompeténsia  ne’ebé atribui  mai TIC TIMOR.

Iha retiru ne’e, fahe mós grupu hodi diskute kona-ba saida maka tenke hapara, hadi’a no kontinua iha tinan oin mai.

Retiru ba tinan ida ne’e, organiza hosi Divizaun Dezenvolvimentu Sistema Aplikasaun (DSA) ne’ebé lidera hosi Diretór DSA, Justo Fernandes ho nia ekipa. Retiru ne’e hala’o iha Semináriu São João Paulo Dare.

Entretantu retiru annual ba tinan 2022 sei organiza hosi Divizaun Administrasaun no Finansas (DAF). #MÉDIA TIC#