FUNSIONÁRIU AUTORIDADE MUNISÍPIU BAUCAU AGRADESE HO PREZENSA HELPDESK

Diretór Planeamentu Autoridade Munisípiu Baucau, Eduardo Filipe Ximenes hato’o agradese ba ekipa Ajénsia TIC ne’ebé agora daudaun hala’o servisu iha edifísiu Autoridade munisípiu Baucau. 
 
 “Relasiona ho Ajénsia TIC nia prezensa iha Munisípiu Baucau bele ajuda ami liu husi komunikasaun no liña internet iha munisípiu sira hotu liu-liu iha munisípiu Baucau nian ne’ebé uza hela sistema Free Balance, ida ne’e ajuda tebes ami hodi halo prosesu pagamentu no dokumentu hirak ne’ebé maka ligadu ho prosesu iha parte finansas nian,” tenik nia.
 
Diretór ne’e mós hato’o agradesimentu ba Ajénsia TIC TIMOR I.P tanba koloka ona Helpdesk ida iha edifísiu autoridade munisípiu Baucau hodi apoiu servisu funsionáriu sira hodi asesu ba liña internet.     
 
“Ami agradese ba Ajénsia TIC TIMOR I.P ne’ebé agora daudaun ninia tékniku iha ami nia munisípiu kompara ho tempu uluk bainhira hetan fallansu ruma ami presiza halo pedidu ba, no dala ruma ema la mai atu rezolve problema ida ne’e, maibé agora daudaun dezde Ajénsia TIC nian ekipa Helpdesk mai iha ami nia fatin ajuda ona ami hodi hala’o ami nia servisu” nia dehan.      
           
Diretór ne’e informa tan katak, bainhira TIC TIMOR I.P fornese liña internet iha kada Autoridade munisípiu sira funsionáriu sira asesu internet liu husi Modem. 
    
“Ho TIC nia prezensa iha ami nia  fatin sente kontente tanba iha tempu TIC seidauk eziste ami hetan difikuldade dala ruma ami uza de’it modem hodi halo koneksaun maibé dezde TIC mai monta nia sistema iha fatin ida ne’e ami la sente ona difikuldade hirak ne’e” deklara nia. #Media #TIC