FUNSIONÁRIU HELPDESK BA MUNISÍPIU 12 TUIR TREINAMENTU BÁZIKU ANTES HALA’O SERVISU

Funsionáriu foun Ajénsia Tecnologia da Informação e Comunicação (TIC) TIMOR I.P  ba pozisaun helpdesk iha Munisípiu 12 tuir treinamentu báziku kona-ba  konseitu rede internet  durante semana rua antes dezloka ba Munisípiu.
Objetivu husi treinamentu ne’e, atu fó instrusaun kona-ba sira nia koñesimentu nune’e, tun ba terenu sira prontu ona atu hala’o servisu.
Askar Syarif nu’udar Treinadór hateten, la’ós de’it travel shutting maibé hein katak, sira bele to’o iha konfigurasaun rede internet ne’e rasik, tanba ne’e Ajénsia  fó koñesimentu kona-ba konseitu rede internet ne’ebé hahú husi baze to’o informasaun sira ne’ebé  iha relasaun  oinsá atu  design rede  ne’ebé  relasiona ho IP no seluk tan.
Matéria ne’ebé hanorin maka hanesan, konseitu báziku kona-ba rede internet ne’ebé iha relasaun ho open system interconnection no hein katak sira la’ós de’it hatene kona-ba konfigurasaun rede internet  maibé sira bele hatene detallu oinsá prosesu komunikasaun (Perangkat)  ne’ebé iha rede internet.
Nia dehan, iha semana rua nia laran, sei fó instrusaun liu husi formasaun no sira sei ba iha munisípiu Dili hodi haree diretamente kondisaun rede internet iha Munisípiu no bele hatene kona-ba nia estandarte prosedura.
Iha fatin hanesan, Dulce Baptista Araújo, nu’udar funsionária helpdesk iha Munisípiu Baucau hateten, sira aprende kona-ba internet, TCP, IP no iha TCP no IP ne’e rasik fahe ba parte balun hanesan, application, network, line no iha ne’ebá iha mós nia funsaun hotu.
“Ami la’ós hatene hotu ona buat ne’ebé durante ne’e ami simu maibé, ami koko aumenta tanba durante ne’e ami hetan maibé, la hanesan ho ida agora dadauk ho ida ne’e ami esforsu aan atu tuir treinamentu ne’e ho di’ak atu nune’e bele implementa fali,” katak nia.
Nia afirma, treinamentu ida ne’e, fó benefísiu boot tanba durante ne’e, nuka aprende kona-ba liña internet tanba ne’e pasu di’ak atu bele implementa iha servisu ne’ebé sei halo.
Nia mós sujere ba Ajénsia, bainhira iha treinamentu hanesan ne’e, di’ak liu fó kedas laptop nune’e bele prátika kedas nune’e bele halo koneksaun ho di’ak.
Alende ne’e, Evangelino Aparício nu’udar Funsionáriu Helpdesk iha Munisípiu Viqueque hateten, formasaun ne’e atu hatene di’ak liu tan kona-ba koneksaun liña internet hodi fasilita servisu iha Munisípiu.
Nia mós informa katak, liu husi formasaun ida ne’e bele kapasita liu tan sira nia kapasidade hodi bele kontribui ba prosesu dezenvolvimentu.
Partisipa iha treinamentu ne’e, maka kandidatu helpdesk ba Munisípiu 12 no tékniku husi munisípiu Baucau, Manufahi, Liquica   inklui estajiáriu sira ne’ebé hala’o estájiu iha Ajénsia TIC TIMOR I.P.
Entretantu, treinamentu ne’e hala’o durante semana rua nia laran no bainhira remata formasaun refere, kandidatu hirak ne’e sei dezloka ba Munisípiu hodi hahú sira nia servisu.#Média TIC#