FUNSIONÁRIU HELPDESK NA’IN 12 DESLOKA BA MUNISÍPIU

Funsionáriu Helpdesk na’in 12 husi Ajénsia Tecnologia da Informação e Comunicação (TIC) TIMOR I.P dezloka ba munisípiu 12 hodi halo atendementu servisu Ajénsia nian iha munisípiu.

Iha serimónia dezlokasaun, Diretór Ezekutivu Ajénsia TIC TIMOR I.P, Roberto Caitano de Sousa Vicente, apela ba funsionáriu hirak ne’e katak, sira lori Ajénsia nia imajen tanba ne’e tenke servisu iha ekipa, haraik aan no umilde.

 

Nia dehan, sira la’ós permanente iha munisípiu ida maibé sei iha rotasaun hodi bele hamosu sentidu unidade nasionál. Laiha dúvida ba funsionáriu nia kapasidade tanba konkorre iha faze teste ne’ebé barak la’ós haree de’it ba sira nia matenek maibé halo teste ba sira nia atitude.

 

Alende ne’e, Diretora Rekursu Umanu, Ministériu Administrasaun Estatál (MAE) Maria Dulce hateten, liu husi dezenvolvimentu teknolojia bele apoia administrasaun públika ne’ebé efisiénsia nomós transparénsia tanba munisípiu 12 sei falta rekursu umanu ho nune’e prezensa funsionáriu hirak ne’e, bele hadi’a liu tan kualidade servisu iha Munisípiu .

 

Funsionáriu hirak ne’e kompostu husi mane na’in 7 feto na’in 5 no sei destaka iha munisípiu Aileu, Ainaro, Baucau, Bobonaro, Cova-Lima, Dili, Ermera, Liquica, Manatuto, Manufahi, Lautem, no Viqueque.