INCT HUSU AJÉNSIA TIC TIMOR I.P ATU KRIA BIBLIOTEKA ELETRÓNIKA HODI KONSERVA REZULTADU PESKIZA

Presidente Ezekutivu Institutu Nasionál Siénsia Teknolojia (INCT) José Cornelio Guterres, hasoru malu ho Diretór Interinu Ajénsia Tecnologia da Informação e Comunicação (TIC) TIMOR I.P Justo Fernandes no Diretór Infraestrutura André Felix Marques hodi husu, atu kria biblioteka eletrónika, hodi konserva rezultadu peskiza ne’ebé, Peskizadór nasionál no internasionál sira halo.

Iha sorumutu ne’e, Presidente Ezekutivu informa katak, ne’e obrigatóriu ba peskizadór sira, tanba durante ne’e, ema husi estranjeiru halo peskiza maibé la hatene konservasaun dadus. Ho ida ne’e, agora tenke hatene no peskiza sira ne’ebé halo iha Timor-Leste presiza rai iha ne’e.

Nia dehan, agora sira halo hela lei atu haree oinsá, harii infraestrutura nomós liña internet ne’ebé tenke forsa.

Presidente ne’e afirma, sira presiza iha website, tanba to’o ohin loron internet la forsa, ho ida ne’e mosu ideia ida hodi husu ajuda ba TIC TIMOR I.P atu kria website tanba iha futuru presiza duni liña internet ne’ebé di’ak.

Iha biban ne’e, nia mós introdús kona-ba INCT ne’ebé, eziste iha tinan 2014 bazeia ba dekretu lei númeru 23/2014, nia misaun prinsipál maka, atu halo peskiza nomós oinsá atu harii biblioteka eletrónika . oras ne’e dadauk sira halo  peskiza ne’ebé kompostu ba parte rua hanesan, peskiza puro no peskiza aplikada.

Peskiza puro haree kona-ba, teoria sira ne’ebé liga ba Universidade sira hodi sai referénsia ba estudu. Peskiza aplikada hanesan, rezolve problema liga ba Governante sira karik, sira halo planu ruma tenke iha planu ne’ebé bazeia ba dadus no iha futuru INCT maka sei fornese dadus sira ne’e.

Ho nune’e, Diretór Interinu TIC TIMOR I.P hateten, ida ne’e hanesan responsabilidade Ajénsia nian no parte infraestrutura sei ba haree rekizitu sira, hodi halo planu ba asuntu refere.

Nia afirma, TIC TIMOR I.P nia prezensa, atu implementa Governu eletróniku tanba ne’e   biblioteka eletróniku mós hola parte ona iha ne’ebá.

Ho ida ne’e, Ajénsia preparadu liu husi parte aplikasaun bele dezenvolve website no iha aplikasaun balun kona-ba biblioteka eletrónika, karik presiza atu dezenvolve tanba ida ne’e tau mós iha planu e-Government nian hodi bele fasilita estudante sira.

Alende ne’e Diretór Infraestrutura André Felix Marques mós hateten, kona-ba preokupasaun ne’ebé INCT iha, presiza mós investe iha área infraestrutura tanba atu liga mai TIC TIMOR tenke iha koneksaun rede internet.

Tanba ne’e, ekipa tékniku sei ba halo peskiza iha INCT, hodi haree infraestrutura saida de’it maka agora eziste, nune’e bele halo proposta ida hodi halo koneksaun husi INCT mai data center TIC TIMOR I.P nian. Bainhira koneksaun sira ne’e iha ona maka sei rezolve liña internet, hosting website no aplikasaun sira seluk ne’ebé bele dezenvolve kona-ba biblioteka eletrónika.  # Média TIC#