INSTITUISAUN ESTADU 40 RESIN SERVISU HAMUTUK ONA HO TIC TIMOR I.P IHA ÁREA INFORMÁTIKA

Diretór Divizaun Infraestrutura, Ajénsia TIC TIMOR I.P, André Felix Marques informa, durante ezisténsia TIC TIMOR, instituisaun estadu hamutuk 40 resin maka kolabora ona ho Ajénsia ne’e iha ámbitu teknololojia informasaun no komunisasaun inklui instituisaun 17  no  munisípiu 12 halo ona ligasaun direta liu husi  kabu Fibra Óptika Terrestre (FOT) ba iha  sentru dadus Governu nian ne’ebé zere husi Ajénsia TIC TIMOR.

 Ajénsia ne’e mós fornese ona servisu informátika ho koneksaun hodi asessu ba konteudu lokál maka  hanesan, sistema GRP, Dalan ba Futuru (DBFT), SIGAPNET (CFP), servisu informátika sira seluk maka hanesan, web hosting, Domine Name, Hosting, active Directory, Email System, Video Conference System liu husi rede Fibra Ótika Terrestre.

Tuir Diretór ne’e katak, Divizaun Infraestrutura hanesan, Divizaun ida ne’ebé fornese servisu infraestrutura rede no sentru dadus ba instituisaun estadu hotu. Divizaun ida ne’e, kompostu husi  departamentu tolu maka hanesan, departamentu infraestrutura rede ne’ebé responsabiliza ba infraestrutura rede, fornese servisu konetividade rede no halo planeamentu rede, ba iha instituisaun estadu sira nomós ba 12 munisípiu.

 Departamentu daruak maka, departamentu infraestrutura sentru dadus ne’ebé, responsavel ba infraestrutura sentru dadus hodi fornese servisu hanesan, DNS hosting, email hosting, kolokasaun, file sharing, ba instituisaun estadu no 12 munisípiu .

Departamentu datoluk maka nasionál helpdesk, Ajénsia TIC TIMOR I.P liu husi  departamentu ida ne’e,  destaka tékniku helpdesk na’in 12   iha munisípiu 12 atu fó apoiu no haree liu ba kliente sira hodi fornese servisu tékniku informátika ba funsionáriu sira ne’ebé servidu iha munisípiu 12 la inklui RAEOA.

“Servisu husi ajente helpdesk ne’ebé maka reprezenta iha ne’ebá, hodi hakmaan autoridade munisípiu sira nia servisu liu-liu iha área informátika nian, dala ruma problema ho file word, excel sira ne’e, sira labele hadi’a mesak maibé bainhira reprezentante sira ne’e iha, sira sente ajuda tebes sira nia servisu loroloron,” dehan Diretór Infraestrutura.

Nia esplika, hafoin prezensa tékniku helpdesk iha munisípiu12, iha ona mudansa ba servisu informátika tanba durante ne’e, hetan problema iha área informátika nian tenke lori mai nasionál maibé ho reprezentante TIC TIMOR nian iha munisípiu 12 ajuda tebes funsionáriu sira iha munisípiu hodi apoiu servisu tékniku.

“Ho prezensa  tékniku helpdesk, hafasil ona servisu munisípiu nian liu-liu iha konteúdu ba aplikasaun ne’ebé maka Governu iha hanesan, GRP no Dalan ba Futuru (DBFT) antes ne’e, aplikasaun sira ne’e, liu husi internet dala ruma   fim do ano sira tenke lori dokumentu, mai halo iha Dili maibé hafoin servisu ne’ebé maka TIC TIMOR fornese liu husi rede FOT ida ne’e, sira la presiza ona lori dokumentu mai nasionál iha fim do ano maibé sira bele prosesa iha ne’ebá ho koneksaun lokál ne’ebé maka lalais, seguru hanesan mós sira asesu aplikasaun ne’e iha Ministériu Finansas,” dehan nia.

Entretantu, TIC TIMOR mós fornese korreiu eletróniku ofisial, email ofisial ba sira atu bele hafasil liu komunikasaun munisipál ho nasionál ka entre sira ho sira. #MÉDIA TIC#