INSTITUISAUN ESTADU 42 HAHÚ HOSTING WEBSITE IHA SISTEMA NO APLIKASAUN TIC TIMOR I.P. NIAN

Papél Ajénsia Tecnologia da Informação e Comunicação (TIC) TIMOR I.P, ne’ebé sentraliza no asegura sistema informátika Governu nian iha sentru dadus Governu, liuhosi TIC TIMOR. Ho nune’e, TIC TIMOR liuhosi Divizaun Sistema Aplikasaun (DSA) ho nia papél no responsabilidade atu asegura Governu eletróniku nu’udar meiu ida atu bele hakbesik Governu ba povu liuhosi Governu Eletróniku.

Tanba ne’e, DSA iha planu konsentra hotu servisu diseminasaun informasaun hosi Instituisaun ne’ebé tutela ba Governu RDTL iha fatin ida ka hosting iha fatin ida, ne’ebé sei loke-dalan ba Big Data Governu nian. 

Ho papél no responsabilidade ne’ebé temi iha leten, dadauk ne’e iha ona instituisaun Estadu 42 mak hahú host ka rai sira-nia website iha TIC TIMOR I.P. nia infraestrutura. La’ós de’it website maibé hosting mós aplikasaun web.

Tuir Diretór Divizaun Dezenvolvimentu Sistema no Aplikasaun (DSA), Justo Fernandes katak, servisu ospedajen ne’e atu fornese espasu iha servidór TIC TIMOR I.P. nian ba Instituisaun Governu, ne’ebé hakarak aproveita servisu ida-ne’e hodi hosting entidade sira-nia website atu nune’e públiku bele hetan asesu.

Vise-Diretór Ezekutivu ne’e mós esplika, iha servisu ida-ne’e, DSA fornese mós konta painél ba entidade sira hodi bele jere no administra sira-nia website. Konta painél nu’udar sistema ida, ne’ebé fó-fasilidade interface ba utilizadór hodi jere, atualiza, kria no modifika sira-nia website.

Nia dehan, iha mós servisu dezenvolvimentu website hosi DSA ne’ebé, mak entidade governamentál sira bele aproveita bainhira sira la iha rekursu natoon atu dezenvolve rasik sira-nia website. DSA iha tékniku ne’ebé ho kualifikasaun no prontu atu bele ajuda entidade Governu sira hodi dezenvolve sira-nia website. Ekipa DSA iha tékniku na’in-13, ne’ebé kualifikadu no profisionál hodi hatán ba nesesidade sira-ne’e.

“Iha besik website 20 ne’ebé maka kria ona liuhosi TIC TIMOR I.P. nian, DSA ajuda entidade sira-ne’e hodi diseminasaun sira-nia ezisténsia ba públiku no fahe informasaun ba populasaun Timoroan,” informa Diretór DSA. 

Tanba ne’e, DSA iha papél importante ida atu ajuda instituisaun Governu sira tomak, hodi jere sira-nia website atu bele habelar sira nia informasaun ba povu Timor-Leste tomak. Website sira- ne’e nu’udar meiu ida atu divulga informasaun kona-ba entidade ida nian. Nune’e, sidadaun hotu-hotu ne’ebé presiza hetan servisu hosi entidade refere bele iha koñesimentu. 

“Servisu dezenvolvimentu ne’ebé DSA hala’o liuhosi TIC TIMOR I.P. mak hanesan hosting ba sira-nia website, dezenvolve website, web aplikasaun no mobile aplikasaun,” nia informa. 

Diretór ne’e salienta tan katak, DSA mós iha portfóliu ida atu fornese servisu dezenvolvimentu aplikasaun web no aplikasaun mobile bazeia ba instituisaun Governu sira-nia pedidu no nesesidade atu fasilita sira-nia servisu sai efisiente liután. Sistema no aplikasaun hirak-ne’e, bele halo atendementu públiku ka bele mós hanesan, halo jestaun no administrasaun interna instituisaun ida-idak nian.

Divizaun Sistema no Aplikasaun iha rekursu ne’ebé, mak halo peskiza ka estudu atu uza teknolojia ne’ebé resente no seguru liu no iha momentu hanesan, dezenvolve aplikasaun lalais liu atu hatán ba nesesidade sira-ne’ebé urjente. Estudu hirak-ne’e mós, halo ba ferramenta sira hodi halo teste penetrasaun ba website no aplikasaun ka sistema sira-ne’ebé maka identifika ona nu’udar alvu.

Ekipa DSA mós prepara relatóriu hosi estudu hodi fó-solusaun ba problema sira liuhosi teknolojia ne’ebé maka resente, efisiente no lalais-liu.

“DSA ho nia ekipa aloka hela orsamentu tanba iha planu atu fó-treinamentu no fahe koñesimentu kona-ba TIC TIMOR ninia ezisténsia nomós atu fahe informasaun kona-ba teknolojia ba populasaun Timor tomak liu-liu jerasaun foun sira. Iha planu ida ne’e, TIC TIMOR I.P sei vizita fatin hotu iha munisípiu 13 no bá eskola sira atu bele fahe koñesimentu no esperiénsia ba populasaun sira,” tenik nia

Aleinde ne’e, DSA mós fó-treinamentu ba entidade sira-ne’ebé envolve TIC TIMOR I.P. iha dezenvolvimentu ba sira-nia website. Ekipa DSA iha fulan-Maiu nia laran fó treinamentu ba Ekipa Gabinete Jestaun Kualidade ba Saúde oinsá sira bele jere no atualiza sira-nia website.

DSA iha planu atu fó-kapasitasaun no sertifikasaun ba membru DSA liuhosi fó-tulun ba parseria sira. Papél importante DSA nian ida mak hasa’e kapasidade rekursu umanu liuhosi kapasitasaun no treinamentu ho teknolojia no ferramenta sira-ne’ebé maka resente liu. Planu ida-ne’e atu asegura implementasaun Governu Eletróniku iha futuru ne’ebé maka sustentavel.

Nia informa liután katak, TIC TIMOR I.P. liuhosi DSA fó mós apoiu tékniku ba instituisaun Governu sira, ne’ebé tau fiar ba TIC TIMOR I.P. hodi rai no jere sira-nia sistema nu’udar ezemplu website ka sistema aplikasaun sira seluk. DSA nu’udar responsavel úniku ba servisu ida ne’e, disponibiliza aan hodi hatán pedidu ruma hosi instituisaun balu ne’ebé iha problema ho sira nia website.

Bainhira mosu kazu urjénsia ho prioridade ás no krítiku ne’ebé, necesita intervensaun lalais, DSA sei disponibiliza-an hodi responde pedidu urjente ne’e, iha oras 24/7 hodi bele garante kontinuidade serbisu no rezolusaun ba problema sira. 

Entretantu, DSA mós disponibiliza aplikasaun rejistu ba pedidu rezolusaun problema sira liuhosi ninia website dedikadu ba DSA iha https://apps.tic.gov.tl iha formatu eletróniku.  #MÉDIA TIC#