KAK OFISIALMENTE LANSA PLATAFORMA FORMULARIU ONLINE BA DRBI DEZENVOLVE HOSI TIC TIMOR I.P.

Komisaun Anti Korupsaun (KAK) lansa plataforma formuláriu online ba Deklarasaun Rendimentu, Bens no Interese (DRBI) ne’ebé dezenvolve hosi Ajénsia Teknolojia Informasaun no Komunikasaun, sigla português (TIC) TIMOR I.P.

Sistema ne’e, dezenvolve bazeia ba lei númeru 7/2020 loron 26 fulan Agostu kona-ba Medida sira ba Prevensaun no Kombate Korupsaun, nu’udar rejime jurídiku ida ne’ebé maka estratéjiku tebes ba luta kontra korupsaun nomós krime ho natureza ekonómiku finanseira iha Timor-Leste.

Objetivu hosi DRBI ne’e, atu proteje no dignifika integridade funsionáriu públiku nu’udar servidór estadu no integridade instituisaun públiku sira. Atu limite risku korupsaun no prevene konflitu interese pesoal no grupu. Atu deteta aumenta rikeza signifikativu no injustifikadu, no promove ambiente servisu ne’ebé livre hosi prátika korupsaun no taka dalan ba oportunidade no risku korupsaun.

Iha serimónia lansamentu ne’e Ministru Prezidénsia ba Konsellu Ministru, Fidelis Manuel Leite Magalhães hanesan Porta Voz Governu nian hatete, iha sistema DRBI ne’ebé maka felizmente halo kolaborasaun ne’ebé maka di’ak entre KAK no TIC TIMOR I.P. ho ekipa sira Governu nian hanesan pasu konkretu ida, ba esforsu ida ne’ebé konstitui medida preventiva ne’ebé maka importante tebes haktuir ba iha lei númeru 7.

Porta Voz Governu ne’e, husu ba Diretór sira no inspetór sira hotu kontribui hodi prienxe formuláriu ne’e, tanba ida ne’e di’ak hodi aumenta liu tan integridade no kona-ba ema idak-idak nia aan rasik. Ida ne’e, importante la’ós ba membru Governu de’it maibé mós ba sosiedade tanba forma dezenvolvimentu nomós forma oinsá sidadaun ninia fiar ba estadu ne’e la mihis, tenke iha mekanizmu ba verifikasaun sira hanesan ne’e, bele halo metin liu tan ema ida ho polítiku sira ka Diretór sira nia integridade.

Iha fatin hanesan, Diretór Ezekutivu TIC TIMOR I.P., Roberto Caitano de Sousa Vicente, iha nia entrevista hatete, bazeia ba despaxu S.E. Primeiru Ministru Sr. Taur Matan Ruak, iha tinan 2020 hasai karta hodi hahú forma komisaun traballu tékniku hodi kria sistema no fó servisu ne’e ba TIC TIMOR hanesan Ajénsia ida ne’ebé mak haree ba inisiativa Governu Eletróniku iha estadu tomak hodi hahú hanoin atu dezenvolve plataforma online ida refere. Tanba ne’e, hahú hosi tinan 2021 hala’o enkontru ho Tribunal Rekursu nomós KAK iha momentu ne’ebá, hodi haree rekizitu ne’ebé maka sira iha hanesan formatu formuláriu sira ne’ebé maka presiza dezenvolve hodi ajuda TIC TIMOR transforma formatu manual sira ne’e ba sistema online.

“Ho ida ne’e,  KAK ofisialmente lansa sistema ne’ebé maka ho objetivu hanesan ho Tribunal Rekursu maibé fahe de’it Tribunal Rekursu ba apontamentu polítiku sira KAK nian ba ajente Administrativa públika nian, Diretór Jerál, Xefe Departamentu, Diretór sira ka kargu sira ne’ebé maka iha indikasaun abuzu podér ruma” Xefe Ezekutivu informa.

Sistema refere, sei kesi ema hotu ne’ebé servisu iha administrasaun públika estadu nian, ba kargu xefia sira, kuaze 21 mil uzáriu ne’ebé maka sei rejista iha sistema ida ne’e, ho nia eskopu ba estadu, sira ne’ebé mak hetan atribuisaun hosi OJE.

Alende ne’e, Komisáriu KAK, Sergio Hornai hatete, Lei ne’e define ho klaru ba ema sira ne’ebé okupa kargu iha pozisaun estruturál no finansiál iha instituisaun públiku direta no indireta iha Estadu nian sei presta sira nia deklarasaun ba autoridade kompetente ne’ebé tuir lei haruka, temi ho naran Deklarasaun Rendimentu Bens no Interese.

KAK mós konvida Timoroan sira ne’ebé assume kargu titular polítiku, servidór povu ho kargu xefia sira iha instituisaun públiku uza oportunidade ida ne’e atu fó hanoin ba malu hodi ko’alia kona-ba Lei MPCC ne’ebé tama ona iha entrada vigor hahú iha loron 22 Fulan Fevereiru tinan 2021.

Iha tempu badak kargu titular polítiku sei ba deklara iha Tribunal Rekursu no kargu funsaun públiku nian sira sei mai deklara iha KAK. Inklui Prezidente Tribunal Rekursu, Prokuradór Jerál Repúblika ho Adjuntu Prokuradór no Provedór Direitus Umanus mai deklara iha KAK.

Iha biban ne’e, TIC TIMOR mós entrega plataforma formuláriu online DRBI ne’e ba ekipa hosi KAK atu jere no fahe mós sertifikadu apresiasaun ba tékniku hosi KAK ne’ebé tuir ona treinamentu kona-ba oinsá atu jere sistema refere.

Alende ne’e, TIC TIMOR no KAK mós asina Nota Entendimentu hodi hametin kooperasaun servisu entre instituisaun rua ne’e. Nota entendimentu ne’e asina direta hosi Diretór Ezekutivu TIC TIMOR I.P., Sr. Roberto Caitano de Sousa Vicente no Komisáriu KAK, Sr. Sergio Hornai.

Entretantu serimónia ne’e, hala’o iha ámbitu aniversáriu KAK ba dala 12, iha salaun Larigutu  CNE no hetan partisipasaun másimu hosi Membru Governu, kargu xefia sira inklui autoridade munisipál sira.   #MÉDIA TIC#