KONSELLU MINISTRU APRESIA ESTRATÉJIA INTEGRADA BA IMPLEMENTASAUN SISTEMA UNIQUE ID

Reuniaun Konsellu Ministru (KM) semana ne’e, apresia no endosa estratéjia integrada ba implementasaun sistema Identifikadór úniku ka Unique ID ne’ebé, aprezenta husi Koordenadór Komisaun Téknika Eventual (KTE), Roberto Caitano de Sousa Vicente, hanesan mós Diretór Ezekutivu Ajénsia TIC TIMOR I.P.
 
Bazeia ba Rezolusaun Governu númeru 19/2020 iha fulan Marsu, estabelese Komisaun Téknika Eventual (TKE) ho nia papel atu produs dokumentu estratejia integrada ba progama Identifikador Uniku. Tanba ne’e, KTE konklui ona nia servisu tuir mandatu ne’ebé, Konsellu Ministru fó, no aprezenta ona relatóriu no planu asaun ba KM hodi hetan apresiasaun no endosa.
 
Estratéjia ne’e, sei implementa entre tinan 2021 to’o tinan 2025 ne’ebé prevee katak, rejistu dahuluk sei realiza iha trimestre dahaat iha tinan 2022 no bele atinje iha tinan 2025 bele rejista ona ema tokon ida.
 
Sistema Identifikasaun Úniku Sidadaun sira ne’e, hola parte ba programa Reforma Administrasaun Públika no hanesan mós baze importante atu hadi’a prestasaun efetiva no planeamentu servisu públiku sira no atu asegura jestaun koordenasaun polítika sosiál ida ne’ebé di’ak.
 
Unique ID ne’e, sei uza dadus dijitál hodi estabelese identidade dijitál ida ne’ebé sei atribui númeru identifikasaun úniku ne’ebé sei la kria kritériu definidu ruma. UID ne’e sei iha informasaun biográfika kiik barak, hanesan naran, data no fatin moris nian inklui informasaun sira ne’ebé sei uza de’it atu atende nesesidade, komprova identidade no konformidade hanesan, inskrisaun ba servisu no pagamentu Governu nian no loke konta bankária. Sei uza mós informasaun bio métrika sira, ne’ebé ho idade tinan 13 ba leten, hodi estabelese singularidade individu sira nian no fasilita autentikasaun ba seguransa husi identidade únika ida. #MÉDIA TIC#