KOOPERASAUN SERVISU ENTRE TIC TIMOR I.P., NO ANAAA, ATU PROMOVE GOVERNU ELETRÓNIKU

Prezidente Konsellu Diretivu Ajénsia Nasionál ba Avaliasaun no Akreditasaun Akadémika (ANAAA), Azevedo Lourenço da Costa Marçal informa, kooperasaun servisu iha área informátika ne’ebé hala’o entre Ajénsia TIC TIMOR I.P., no ANAAA ho objetivu atu promove Governu Eletróniku atu asegura Governu ne’ebé efisiénsia no efikásia ba servisu públiku sira.  

“Atu promove Governo Elétroniku ne’ebé maka seguru, efisiénsia no efikásia ba servisu Públiku sira, tenke hahú hosi kria Website no iha mós Eletróniku share drive,” dehan Prezidente Konsellu Diretivu iha âmbitu serimónia asinatura Nota Entendimentu, iha salaun INFORDEP Balide.

Nia dehan, TIC TIMOR maka sei asegura baze dadus sira ne’ebé iha no promove dadus sira ne’ebé iha. Alende ne’e, haree oinsá bele promove Governu Eletróniku ba investimentu ne’ebé maka halo daudaun ona hosi TIC TIMOR.

Ho esforsu ne’ebé oras ne’e dadauk investe hosi TIC TIMOR hahú kontribui ba Governu Eletróniku. Alende webhosting, internet services ba Sistema aplikasaun sira, bele hahú haree kona-ba arkivu eletróniku sira ne’ebé maka uza de’it iha save drive.

Nia esplika, ho kooperasaun sira hanesan ne’e, bele atrai instituisaun estadu sira hodi servisu hamutuk hodi promove Governu Eletróniku.

Iha fatin hanesan, Diretór Ezekutivu TIC TIMOR I.P., Roberto Caitano de Sousa Vicente hatete, TIC TIMOR nia papél atu fó apoiu ba instituisaun estadu sira liu-liu iha área ne’ebé espesífiku iha área TIK hanesan, sentralizasaun sistema informátika, rekursu informátika, dezenvolve aplikasaun liga ba Governu Eletróniku, servisu eletróniku sira, haree mós padraun polítika kona-ba sistema informátika sira no servisu sira seluk.

Ho servisu ne’ebé maka hahú, liu hosi akordu ne’ebé asina, TIC TIMOR sei fornese liu-liu oinsá atu atende ANAAA nia nesesidade, atu fahe informasaun ba públiku liu hosi portal sira no hadi’a liu tan sira nia jestaun sistema informátika internal liu hosi  email, konetividade lokál, organiza sira nia sistema dadus internal atu bele fahe dadus ba malu.

“Papél prinsipál ida maka kontribui ba ambiente ne’ebé maka la saudavel liu-liu redusaun kartás tanba atu promove Governu eletróniku. ba oin iha mehi boot no hahú ho pasu neineik katak kada tinan investe hela de’it no ba oin bele investe di’ak liu tan,” Ezekutivu Informa.

Nia dehan, To’o oras ne’e dadauk, instituisaun estadu hamutuk 49 ona maka halo ona kooperasaun servisu ho TIC TIMOR iha área informátika hahú hosi tinan 2017 to’o agora halo ona poupansa ba orsamentu $ 45 milloens hosi OJE ne’ebé maka poupa tiha ona hosi investimentu sistema informátika sira ne’ebé TIC TIMOR uza liu hosi utilizasaun infraestrutura ne’ebé maka TIC TIMOR oferese ona to’o iha 12 munisípiu.

Entretantu Xefe Ezekutivu ne’e, mós agradese ba ANAAA tanba fó ona konfiansa ba TIC TIMOR  hanesan tékniku Timor oan ne’ebé iha ona koñesimentu ne’ebé di’ak tebes hodi fornese solusaun informátika ba ANAAA. #MÉDIA TIC#